हिंदुस्थानच्या विजयाचा पंच; जपानला 3-0 गेल फरकाने हरविले

यजमान अन् गतविजेत्या हिंदुस्थानने आपल्या लौकिकास साजेशी कामगिरी करताना महिला आशियाई चॅम्पियन्स करंडक हॉकी स्पर्धेत जपानचाही 3-0 गोल फरकाने धुव्वा उडवला. स्पर्धेच्या लीग फेरीत सर्व पाच लढती जिंकून विजयाचे पंचक ठोकणारा हिंदुस्थान हा एकमेव संघ होय. हिंदुस्थानने याआधी दक्षिण कोरिया, मलेशिया, थायलंड व चीन या संघांना पराभूत केलेले आहे.  पहिल्या मिनिटापासून आक्रमक झालेल्या हिंदुस्थानला पहिल्या क्वॉर्टरमध्ये दोन पेनल्टी कॉर्नर मिळाले होते, पण त्यांना गोल करण्यात अपयश आले. त्यानंतर चुरशीचा दुसरा क्वॉर्टरही गोलरहीतच राहिला. जपानच्या संरक्षक फळीने अभेद्य खेळ केल्याने मध्यंतरापर्यंत गोलबरोबरीची कोंडी फुटली नव्हती. मध्यंतरानंतर नवनीत कौर हिने 37व्या मिनिटाला मैदानी गोल करीत हिंदुस्थानचे खाते उघडले. त्यानंतर लढतीच्या अखेरच्या 15 मिनिटांत हिंदुस्थानने दोन गोल ठोकले. आता मंगळवारी होणाऱया उपांत्य लढतीत हिंदुस्थानची गाठ याच जपानशी पडणार आहे.