Fakhar Zaman: ‘అందుకే 10 కిలోల బరువు తగ్గాను’! రీఎంట్రీతో ఇచ్చి పడేస్తా అంటోన్న ఓపెనర్..

2 hours ago 2

పాకిస్తాన్ క్రికెట్ జట్టులోకి తిరిగి రాబోతున్న స్టార్ ఓపెనర్ ఫఖర్ జమాన్ తనకు గత కొంతకాలంగా ఎదురైన ఆరోగ్య సమస్య గురించి తాజా వ్యాఖ్యలు చేశారు. గత ఏడాది T20 ప్రపంచ కప్‌లో చివరిసారి పాకిస్తాన్ తరఫున ఆడిన ఫఖర్, ఆ తర్వాత జట్టుకు దూరంగా ఉంటూ వచ్చాడు. అయితే, తాజాగా 2025 ఛాంపియన్స్ ట్రోఫీకి ఎంపికైన అతను 10 కిలోల బరువు తగ్గినట్లు వెల్లడించాడు.

ఫఖర్ జమాన్ పై తాను జట్టుకు దూరమైనప్పటి నుండి పలు వార్తలు వచ్చాయి. ముఖ్యంగా, పాకిస్తాన్ క్రికెట్ బోర్డు (PCB) బాబర్ ఆజంను టెస్ట్ జట్టులో నుండి తొలగించినప్పుడు ఫఖర్ చేసిన ఓ ట్వీట్ వల్ల అతను ఇబ్బందుల్లో పడినట్లు వార్తలు వచ్చాయి. బాబర్‌ను తొలగించడం పట్ల అసంతృప్తి వ్యక్తం చేస్తూ ఫఖర్ ట్వీట్ చేయగా, దాన్ని తప్పుగా అర్థం చేసుకుని PCB అతనికి షో-కాజ్ నోటీసు ఇచ్చిందని ప్రచారం జరిగింది.

అయితే, ఫఖర్ తాజాగా తన జట్టుకు దూరమైన అసలు కారణాన్ని వెల్లడించాడు. తనకు “హైపర్ థైరాయిడిజం” అనే హార్మోన్ల సమస్య వచ్చిందని, అందుకే 10 కిలోల బరువు తగ్గిపోయానని, దీనివల్ల కండరాలు బలహీనపడ్డాయని PCB పాడ్‌కాస్ట్‌లో చెప్పాడు. “ఇది నా ఆరోగ్యానికి పెద్ద సవాల్. నేను కొన్ని నెలలు పూర్తిగా విశ్రాంతి తీసుకోవాల్సి వచ్చింది. కానీ ఇప్పుడు పూర్తిగా ఫిట్‌గా ఉన్నాను” అని ఫఖర్ స్పష్టం చేశాడు.

ఇప్పుడిప్పుడే తన గేమ్‌ను మళ్లీ అందిపుచ్చుకుంటున్న ఫఖర్ జమాన్, తన ఆటపై తిరిగి దృష్టిపెట్టాడు. “దేశవాళీ క్రికెట్‌లో మొదటి నాలుగు నుండి ఐదు మ్యాచ్‌లు కష్టంగా అనిపించాయి. నేను ఎలా ఆడాలో మర్చిపోయినట్లు అనిపించింది. కానీ ఇప్పుడు నా రిథమ్ అందుకుంటున్నాను” అని చెప్పాడు.

“ఈ ఛాంపియన్స్ ట్రోఫీ నాకు చాలా ముఖ్యమైనది. నా శాయశక్తులా వినియోగించి, జట్టుకు మరింత చిరస్మరణీయంగా మార్చాలని అనుకుంటున్నాను” అని ఫఖర్ పేర్కొన్నాడు. 2017 ఛాంపియన్స్ ట్రోఫీ ఫైనల్‌లో భారతదేశంపై విజయానికి కీలకంగా మారిన ఫఖర్, ఆ మ్యాచ్‌లో సెంచరీ చేసి ‘మ్యాన్ ఆఫ్ ది మ్యాచ్’ అవార్డు అందుకున్నాడు. ఇప్పుడు మళ్లీ అదే టోర్నమెంట్‌లో పాకిస్తాన్ కోసం తన ఉత్తమ ప్రదర్శన ఇవ్వాలని భావిస్తున్నాడు.

న్యూజిలాండ్, దక్షిణాఫ్రికాతో జరగబోయే ట్రై-సిరీస్, అలాగే 2025 ఛాంపియన్స్ ట్రోఫీ కోసం పాకిస్తాన్ జట్టు ప్రకటించబడింది. కెప్టెన్ మహ్మద్ రిజ్వాన్ నేతృత్వంలో బాబర్ ఆజం, ఫఖర్ జమాన్, షాహీన్ అఫ్రిది, హరీస్ రౌఫ్, నసీమ్ షా వంటి టాప్ ప్లేయర్లు జట్టులో ఉన్నారు.

అన్నీ అనుకున్నట్లు జరిగితే, ఫఖర్ జమాన్ తిరిగి జట్టులో అదరగొట్టే అవకాశం ఉంది. తన ఆరోగ్య సమస్యల నుంచి కోలుకుని మళ్లీ గ్రౌండ్‌లో మెరుస్తాడా? ఛాంపియన్స్ ట్రోఫీలో తన ఆట తీరు ఎలా ఉండబోతోంది? అన్నది ఆసక్తిగా మారింది.

*** Disclaimer: This Article is auto-aggregated by a Rss Api Program and has not been created or edited by Nandigram Times

(Note: This is an unedited and auto-generated story from Syndicated News Rss Api. News.nandigramtimes.com Staff may not have modified or edited the content body.

Please visit the Source Website that deserves the credit and responsibility for creating this content.)

Watch Live | Source Article