Lifestyle: ఈ చర్మ సమస్యలు డయాబెటిస్‌కు సంకేతాలు కావొచ్చు.. అలర్ట్‌ అవ్వాల్సిందే

ప్రస్తుతం ప్రపంచాన్ని భయపెడుతోన్న అంశాల్లో డయాబెటిస్‌ ఒకటి. రోజురోజుకీ ఈ వ్యాధి బారినపడుతోన్న వారి సంఖ్య క్రమంగా పెరుగుతోంది. 30 ఏళ్ల వారిలో కూడా బయాబెటిస్‌ సోకడం ఆందోళన కలిగిస్తోంది. అయితే డయాబెటిస్‌ను మొదటి దశలోనే గుర్తించి జీవన విధానంలో మార్పులు చేసుకుంటే సమస్య నుంచి బయటపడొచ్చని నిపుణులు చెబుతున్నారు. డయాబెటిస్‌ సమస్యను శరీరం మనల్ని ముందుగానే అలర్ట్‌ చేస్తుంది.

ఇందుకు కొన్ని రకాల సంకేతాలను అందిజేస్తుంది. సాధారణంగా డయాబెటిస్‌ అనగానే కంటి సంబంధిత సమస్యలు, అధికంగా మూత్ర విసర్జన చేయడం, గాయాలు తగ్గడం వంటి సమస్యలే అనుకుకుంటారు. కానీ చర్మ సంబంధిత సమస్యలు కూడా డయాబెటిస్‌కు ప్రాథమిక లక్షణాలుగా చెప్పొచ్చని నిపుణులు చెబుతున్నారు. ఇంతకీ ఆ చర్మంపై కనిపించే ఆ లక్షణాలు ఏంటో ఇప్పుడు తెలుసుకుందాం.

చర్మంపై దురద, ఎరుపు వంటి సమస్యలు డయాబెటిస్‌ ప్రాథమిక లక్షణంగా భావించాలని అంటున్నారు. డయాబెటిస్ బారిన పడిన వారిలో చర్మంపై పొక్కులు కనిపిస్తాయి. ముఖ్యంగా కాళ్లు, చేతుల వేళ్లపై బొప్పలు ఎక్కువగా కనిపిస్తాయి. ఈ పొక్కులు తెలుపు రంగులో ఉంటాయి. అయితే ఎలాంటి నొప్పి ఉండదు. అయితే అప్పుడప్పుడు వచ్చే ఈ బొప్పలు సాధారణంగా మూడు వారాల తర్వాత వాటంతటవే తగ్గిపోతాయి. రక్తంలో షుగర్‌ లెవల్స్‌ పెరిగితే ఇలాంటి లక్షణాలు కనిపిస్తాయి.

డయాబెటిస్‌ బాధితుల్లో స్క్లెరోసిస్ వచ్చే ప్రమాదం కూడా ఉంది. ఇందులో చర్మం సాధారణం కంటే మందంగా మారుతుంది. టైప్-1, టైప్-2 మధుమేహంతో బాధపడుతున్నవ్యక్తుల్లో ఈ సమస్య ఎక్కువగా కనిపిస్తుంది. వేళ్లు, కాళ్ల చర్మం మందంగా మారుతుంది. రక్తంలో చక్కెర స్థాయిలు పెరిగాయనడానికి ఇదొక సంకేతంగా చెప్పొచ్చు. నైక్రోబయోసిస్‌ కూడా డయాబెటిస్‌కు సంకేతంగా చెప్పొచ్చు. కణాలు చనిపోవడాన్ని ఇలా అంటారు. ఈ సమస్య కారణంగా చర్మంపై చిన్న, చిన్నగా కనిపించే ఎర్రటి మచ్చలు ఏర్పడుతాయి. కాబట్టి చర్మంపై ఇలాంటి మార్పులు కనిపిస్తే వెంటనే వైద్యులను సంప్రదించి సంబంధిత పరీక్షలు చేయించుకోవాలి.

నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. ఆరోగ్యానికి సంబంధించి వైద్యుల సూచనలు పాటించడమే ఉత్తమం.

మరిన్ని లైఫ్‌ స్టైల్‌ వార్తల కోసం క్లిక్‌ చేయండి..