Mahim Assembly Election Results : अमित ठाकरे भावुक, म्हणाले ‘ही लाढाई राजपुत्राची नव्हती तर…’

महाराष्ट्र विधानसभेचा निकाल हाती आला आहे, राज्यात पुन्हा एकदा महायुतीचं सरकार आलं आहे. महाविकास आघाडीचा मोठा पराभव झाला आहे तर महाराष्ट्र नवनिर्माण सेनेला खातंही उघडता आलं नाही. माहीम विधानसभा मतदारसंघातून मनसे प्रमुख राज ठाकरे यांचे पुत्र आणि मनसे नेते अमित ठाकरे हे उभे होते, माहिम विधानसभा मतदारसंघात अजूनही मतमोजणी सुरू आहे. महायुतीचे उमेदवार सदा सरवणकर आणि महाविकास आघाडीचे उमेदवार महेश सावंत यांच्यामध्ये अटितटीची लढाई सुरू आहे. तर अमित ठाकरे हे तिसऱ्या क्रमांकावर आहेत. त्यांनी आपला पराभव स्विकारला आहे, त्यानंतर त्यांनी एक भावनिक पोष्ट सोशल मीडियावर शेअर केली आहे.

नेमकं काय म्हणाले अमित ठाकरे?  

‘माहिम, दादर आणि प्रभादेवीतील जनतेचा कौल मला मान्य आहे…

आज विधानसभा निवडणुकीत माझ्या जनतेने जो कौल दिला, तो मी विनम्रपणे आणि अत्यंत आदराने स्वीकारतो.

गेली अनेक वर्षे या प्रभागातील अगदीच बेसिक गरजांसाठी लोकांचा संघर्ष बघितला. याच संघर्षातून उभ्या राहिलेल्या विचारांनी, प्रभागाच्या विकासासाठी आणि बदलासाठी आपण एक नवा अध्याय लिहावा, केवळ या हेतूने मी या निवडणुकीत उतरलो होतो.

मात्र, कदाचित येथील जनतेच्या मनात काही वेगळे असावे. हा कौल मला हेच शिकवतोय की, अजून खूप काम करायचं आहे. अजून मेहनत घ्यायची आहे. अजून संघर्ष करून माझं कर्तृत्व सिद्ध करायचं आहे. आपला विश्वास मिळवण्यासाठी अजून झटायचं आहे.

माझी ही लढाई कधीच राजकीय सत्ता मिळवण्यासाठी नव्हती… कारण ही लढाई कोणा राजपुत्राची नसून, ती होती एका सामान्य कार्यकर्त्याची – जो सर्वांसाठी, आपल्या जनतेसाठी, आपल्या महाराष्ट्राच्या उज्ज्वल भविष्यासाठी झटतो. मला फक्त आपल्या चेहऱ्यावर समाधानाचं हास्य आणायचं होतं.

आजचा कौल माझ्या प्रवासाचा शेवट नाही; एक नवी सुरुवात आहे. तुमच्यासाठी, तुमच्या विश्वासासाठी, माहिम, दादर, प्रभादेवी आणि सबंध महाराष्ट्राच्या विकासासाठी, मी २४ तास झटत राहीन, हा माझा शब्द आहे.

ज्या मतदारांनी माझ्यावर विश्वास दाखवून मला मतदान केलं, त्यांचे मनापासून आभार. तुमचा विश्वास वाया जाणार नाही.

मी वचन देतो – तुमच्या स्वप्नांना पूर्ण करण्यासाठी, तुमच्या विश्वासावर खरे उतरण्यासाठी मी नेहमीच प्रयत्नशील राहीन… कारण माझी लढाई खूप मोठी आहे आणि ती आपण सर्वजण एकत्रितपणे नक्की जिंकू!

आपलाच, अमित ठाकरे’