Maruti Suzuki: ఆ ఘనత సాధించిన తొలి మారుతీ సుజుకీ కారు ఇదే..

కార్లకు ఇచ్చే సేఫ్టీ రేటింగ్ ప్రకారం వాటి డిమాండ్‌ ఆధారపడి ఉంటుందని తెలిసిందే. అందుకే కారు కొనుగోలు చేసే సేఫ్టీ రేటింగ్‌ను కూడా పరిగణలోకి తీసుకుంటారు. అయితే ఈ విషయంలో మారుతీ సుజుకీ ఎప్పటినుంచే పలు విమర్శకుల ఎదుర్కొంటోంది. ఇతర కార్లతో పోల్చితే మారుతి సుజుకీ సేఫ్టీ విషయంలో వెనకబడి ఉంటుందనే వాదన వినిపిస్తూనే ఉంటుంది.

అయితే ఈ విషయంలో తాము తక్కువేం కాదని నిరూపించింది మారుతి. తాజాగా మార్కెట్లోకి తీసుకొస్తున్న మారుతీ సుజుకీకి చెందిన ఫోర్త్‌ జనరేషన్‌ డిజైర్‌ అరుదైన ఘనత సాధించింది. గ్లోబల్‌ ఎన్‌క్యాప్‌ క్రాష్‌ టెస్టులో ఈ కాంపాక్ట్‌ సెడాన్‌ 5 స్టార్‌ రేటింగ్‌ సాధించింది. పెద్దల భద్రత విషయంలో 5 స్టార్‌ రేటింగ్‌, చిన్నారుల భద్రతకు సంబందించి 4 స్టార్‌ పొందిందీ కారు. గ్లోబల్‌ ఎన్‌క్యాప్‌ నుంచి 5 స్టార్‌ రేటింగ్‌ పొందిన తొలి మారుతీ సుజుకీ కారు ఇదే కావడం గమనార్హం.

మారుతీ ఈ వాహనాన్ని స్వచ్ఛంధంగా క్రాష్‌ టెస్ట్‌కు పంపింది. ఇందులో భాగంగానే పెద్దల భద్రతకు సంబంధించి 34 పాయింట్లకు గాను 31.24 పాయింట్లను దక్కించుకుంది. అలాగే చిన్నారుల భద్రత విషయానికొస్తే 42 పాయింట్లకు గాను 39 పాయింట్లు సాధించింది. ఈ కొత్త కారులో ఆరు ఎయిర్‌బ్యాగులు, అన్ని సీట్లకు 3 పాయింట్‌ సీట్‌ బెల్ట్‌ విత్‌ రిమైండర్‌ను అందించారు.

ఇక కొత్త మారుతి డిజైర్‌ విషయానికొస్తే ఈ కారు.. ఇంటీరియర్‌లో అనేక మార్పులు చేశారు. ప్రస్తుతం ఈ కార్లకు సంబంధించి బుకింగ్‌లు కొనసాగుతున్నాయి. ఇంకా కారు ధరలను కంపెనీ నిర్ణయించలేదు. నవంబర్‌ 11వ తేదీన ఈ ధరలను వెల్లడించనున్నారు. ధర ప్రకటించే ముందు ఈ టెస్ట్‌ వివరాలు వచ్చాయి.

మరిన్ని బిజినెస్ వార్తల కోసం క్లిక్ చేయండి..