Narendra Modi | पंतप्रधान नरेंद्र मोदींच्या हत्येचा कट; मुंबई पोलिसांना आला फोन

पुढारी ऑनलाईन डेस्क : मुंबईत राज्यातील नव्या सरकारच्या शपथविधी सोहळ्याला पंतप्रधान नरेंद्र मोदी उपस्थित राहण्याची शक्यता असतानाच त्यांच्या हत्येचा कट रचल्याचा फोन मुंबई पोलिसांना आला आहे. धमकीचा फोन येताच खळबळ उडाली. मुंबई पोलिसांनी तात्काळ तपास सुरू केला. पोलिसांनी याप्रकरणी एका महिलेला अटक केली आहे.

बुधवारी रात्री ९ च्या सुमारास मुंबई पोलिसांच्या नियंत्रण कक्षाला धमकी देणारा फोन आला होता. पंतप्रधान मोदींना मारण्याचा कट सुरू असून तयारी झाल्याचे फोन करणाऱ्या व्यक्तीने सांगितले. या घटनेची गंभीर दखल पोलिसांनी घेत फोन करणाऱ्या व्यक्तीचा शोध सुरू केला. तपासादरम्यान मुंबईच्या आंबोली पोलिसांनी कॉल करणाऱ्या एका महिलेला अटक केली आहे. पोलिसांनी महिलेची चौकशी करून तिची पार्श्वभूमी देखील तपासली. परंतु काहीही संशयास्पद आढळले नाही. कौटुंबिक समस्यांमुळे पीडित महिलेने असा फोन केला होता. दरम्यान पोलीस या प्रकरणाचा अधिक तपास करत आहेत.