Nashik Election Traffic Updates | नाशिक वाहतूक पोलिसांकडून वाहतूक मार्गात बदल

नाशिक : पुढारी ऑनलाइन डेस्क – महाराष्ट्र विधानसभा निवडणुकीच्या मतदानासाठी उद्या बुधवारी (दि.20) मतदान साहित्य यंत्रणेकडून देण्यात येणार असल्याने साहित्य, निवडणूक अधिकारी आणि अन्य काही वस्तुंची ने-आण करण्यासाठी होणाऱ्या वाहतुकीमुळे कोंडी हाऊ नये, यासाठी नाशिक वाहतूक पोलिसांकडून वाहतूक मार्गात बदल करण्यात आले आहेत.

इगतपुरी मतारसंघासाठी सीबीएस परिसरातील वाहतूक व्यवस्थेत बदल करण्यात आलेला आहे. सीबीएस सिग्नल ते मेहेर सिग्नलकडे जाणारा आणि मेहेर सिग्नल ते सीबीएसकडे येणारा अशा दोन्ही बाजूकडील रस्ते वाहनांसाठी बंद करण्यात आलेले आहेत. नाशिक मध्य विधानसभा मतदारसंघासाठी कर्मवीर दादासाहेब गायकवाड सभागृह परिसरातील वाहतूक मार्गात बदल आलेला आहे. गायकवाड सभागृह ते हिरवे नगरपर्यंत नंदिनी नदी बाजुलगतच्या मार्गापर्यंत सर्व प्रकारच्या वाहनांना बंदी आहे. वाहनचालकांनी अन्य पर्यायी मार्गाचा अवलंब करावा, असे आवाहन वाहतूक विभागाच्या वतीने करण्यात आलेले आहे.

नाशिक पूर्व विधानसभा मतदारसंघासाठी मीनाताई ठाकरे क्रीडा संकुलातून मतदान साहित्याचे वाटप मंगळवारी (दि.19) सकाळी सात ते सायंकाळी सात या वेळेत करण्यात आलेले आहे. तसेच बुधवारी (दि.20) हे साहित्य सकाळीच जमा होईल. या काळात होणारी वाहतूक काेंडी पाहता स्वामी नारायण चौक, मीनाताई ठाकरे क्रीडा संकुल ते कर्मवीर काकासाहेब वाघ महाविद्यालयपर्यंत धुळे मार्गाने कडील मुंबई-आग्रा महामार्गालगतच्या सेवा मार्गावरील वाहतूक सर्व प्रकराच्या वाहनांसाठी बंद करण्यात आलेली आहे. नाशिक पश्चिमसाठी संभाजी स्टेडियम परिसरातील वाहतूक मार्गात बदल असून यामध्ये महाले पेट्रोल पंप ते सिंहस्थ नगर या मार्गावर दोन्ही बाजूने वाहनांना प्रवेश बंद करण्यात आलेला आहे. स्टेट बँक चौक ते रतनसिंह बाबुसिंग परदेशी चौक या मार्गावरही दोन्ही बाजूने वाहनांना प्रवेश बंदी राहणार आहे.