Reel बनवण्याच्या नादात प्राण गमवावे लागले, दुचाकीवर व्हिडीओ बनवताना मित्रांचा मृत्यू

सोशल मीडियावर Reel बनवणाऱ्या तरुण तरुणींची संख्या लाखात आहे. व्हायरल होण्यासाठी कोणत्याही गोष्टीचा विचार न करता धोकादायक पद्धतीने व्हिडीओ बनवून सोशल मीडियावर अपलोड केले जातात. असाच एक व्हिडीओ बनवत असताना भयंकर अपघात होऊन दोन मित्रांचा मृत्यू झाल्याची धक्कादायक घटना उघडकीस आली आहे.

राजस्थानच्या अलवर जिल्ह्यामध्ये हा धक्कादायक प्रकार घडला आहे. निशांत आणि दीपक अशी या मित्रांची नावे असून हे दोघे बाईकवर उभे राहून स्टंट करत त्याचा व्हिडीओ बनवत होते. याच दरम्यान अचानक त्यांच्या बाईकची एका कारला जोदरार धडक झाली. या भयंकर अपघातात निशांतचा जागीच मृत्यू झाला तर दीपक सैनी याचा रुग्णालयात नेत असताना वाटेतच मृत्यू झाला.

पोलिसांनी दिलेल्या माहितीनुसार, दुचाकीवर उभे राहून रील बनवत असताना दुचाकीवरील त्यांचे नियंत्रन सुटले आणि त्यांची दुचाकी समोरून येणाऱ्या गाडीला धडकली. मृताच्या नातेवाईकांनी लेखी तक्रार दाखल केली आहे. त्या आधारे पोलिसांनी गुन्हा दाखल करून तपासाला सुरुवात केली आहे.