Thane Crime | धक्कादायक ! शेजारी राहणाऱ्या साडेतीन वर्षीय मुलाचे अपहरण करुन 60 हजारांना विकले

भिवंडी | शेजारी राहणाऱ्या इसमाने साडेतीन वर्षाच्या मुलाला मुंबईत अवघ्या साठ हजार रुपयात विकले असल्याची खळबळजनक घटना शांतीनगर परिसरातील रामनगर येथे घडली होती. घटनेचे गांभीर्य लक्षात घेता शांतीनगर पोलिसांनी सीसीटीव्ही फुटेज व तांत्रिक तपासाच्या साहाय्याने अवघ्या बारा तासात मुलाचा शोध घेत याप्रकरणी शेजाऱ्यासह इतर दोन जण असे तिघांना अटक केली असल्याची माहिती शांतीनगर पोलिसांनी मंगळवारी दिली आहे. मोह. युनूस अमिनुद्दिन शाह (वय ५३ वर्ष रा. रामनगर झोपडपट्टी, भिवंडी), पिर मोह. रफिक अहमद शाह (वय ३९ वर्ष) व समसुद्दीन मुख्तार शाह (वय ४५ वर्ष दोघे रा. सेवक नगर, साकी नाका कुर्ला ) अशी गुन्हा दाखल करण्यात आलेल्या तिघा आरोपींची नावे आहे.

अमन (नाव बदलेले) साडेतीन वर्ष असे अपहरण झालेल्या मुलाचे नाव आहे. अमन हा १७ नोव्हेंबर रोजी घराशेजारी खेळत असताना आरोपी मोहम्मद युनूस शाह याने त्यास हॉटेलमध्ये खाऊ खाण्याच्या बहाण्याने नेले होते. त्यानंतर मुलाला घेऊन शहरातील अंजुर फाटा येथे कुर्ला मुंबईतील पीर मोहम्मद रफीक अहमद शहा व त्याचा साथीदार समसूद्दीन मुख्तार शहा यांच्याकडे मुलाला अवघ्या ६० हजारात विकले होते.

शांतीनगर पोलिसांनी मुलाची सुखरूप सुटका करून परत आणल्याने आतीकच्या आई-वडिलांनी शांतीनगर पोलिसांचे आभार मानले. शहरात लहान मुलांबाबत निष्काळजीपणा होत असून लहान मुलांना शहरात पालकांनी एकटे सोडू नये, त्यांच्यावर सतत लक्ष द्यावे, असे आवाहन शांतीनगर पोलीस ठाण्याचे वरिष्ठ पोलीस निरीक्षक विनायक गायकवाड यांनी नागरिकांना केले आहे.