Thane Politics | भाजपच्या बालेकिल्ल्यात कमळ फुलणार की मशाल

Published on

: 

19 Nov 2024, 6:24 am

Updated on

: 

19 Nov 2024, 6:24 am

2014 च्या विधानसभा निवडणुकीत डोंबिवली मतदारसंघात अनेक जण उभे होते. पण 2019 मध्येही भाजपा, काँग्रेस आणि मनसे अशी तिहेरी लढत झाली होती. आता पुन्हा एकदा महायुतीचे उमेदवार रविंद्र चव्हाण या मतदारसंघातून निवडणूक लढवत आहेत. राज्याच्या मंत्रिमंडळात चव्हाण देखिल मंत्री आहेत. गेल्या तीन निवडणुकीत त्यांनी विजय मिळवला आहे आणि आता चौथ्यांदा ते रिंगणात आहेत. डोंबिवलीत अनेक विकास कामे रखडली आहेत. त्यामुळे यंदा त्यांना काहीसा फटका बसू शकतो. पण तरी देखील महाविकासआघाडीला उमेदवाराला येथे टफ फाईट देण्यासाठी मेहनत घ्यावी लागणार आहे.

महाविकास आघाडीकडून दीपेश म्हात्रे हे निवडणुकीच्या रिंगणात आहेत. हा मतदारसंघ भाजपाचा पारंपरिक मतदारसंघ आहे. त्यामुळे भाजपाच्या या बालेकिल्ल्यात जर सुरुंग लावायचा असेल तर महाविकास आघाडीला भरपूर प्रयत्न करावे लागणार आहेत. 2019 मध्ये रविंद्र चव्हाण यांना मनसेच्या मंदार हळबे यांनी चांगली टक्कर दिली होती. श्रीकांत हळबे यांना 41 हजार 311, तर रविंद्र चव्हाण यांना 83 हजार 872 मते मिळाली होती.

शिवसेनेत सामान्य शिवसैनिकाऐवजी केवळ पैशांच्या ताकदीला (मनी पॉवर) प्राधान्य दिले जाते. अशा परिस्थितीत सामान्य शिवसैनिकांचा जीव घुसमटतो आहे. गेल्या पाच दशकांमध्ये डोंबिवलीकरांनी नेहमीच वैचारिकदृष्ट्या शिवसेना-भाजपा युतीला साथ दिली. या युतीचे उमेदवार रविंद्र चव्हाण यांना उबाठा शिवसेनेचे माजी जिल्हाप्रमुख सदानंद थरवळ यांनी स्वर्गीय बाळासाहेबांना लिहिलेल्या अनावृत्त पत्रातून पाठिंबा व्यक्त केला आहे.डोंबिवली विधानसभा निवडणुकीत उमेदवारीतून डावलल्याने थरवळ यांनी त्यांच्या पदाचा राजीनामा दिला होता. सोमवारी स्व. बाळासाहेब ठाकरे यांच्या स्मृतिदिनाचे औचित्य साधून थरवळ यांनी पत्र लिहिले आहे.शिवसेना या चार अक्षरी मंत्राने झपाटलेला मी तुमचा आणि दिघेसाहेबांच्या ठाणे जिल्ह्यातला कट्टर शिवसैनिक असून या युतीचा भाग असलेल्या शिवसेनेचा कार्यकर्ता म्हणून आम्हांस जवळून काम करण्याची संधी मिळाली. बारा वर्षांपूर्वी तुम्ही आमच्यातून कायमचे निघून गेलात तेव्हा तुमच्या पवित्र स्मृतीला वंदन करण्यासाठी लोटलेल्या लाखो शिवसैनिकातला मी एक शिवसैनिक असल्याचे थरवळ यांनी पत्रात नमूद केले आहे.

ते पुढे लिहितात की तुम्हाला भावपूर्ण श्रद्धांजली देणारे त्या दिवशीचे फलक मला आजही डोळ्यासमोर येतात....

श्वासाची माळ तुटली...ध्यासाची नव्हे...साहेब शिवसेनेचा आणि... तुमचा ध्यास घेतलेली आमची कट्टर शिवसैनिकांची पिढी असल्याच्या भावना त्यांनी आपल्या पत्रातून व्यक्त केल्या.

80 टक्के समाजकारण करणार्‍या आमच्यासारख्या शिवसैनिकांऐवजी आता 100 टक्के अर्थकारण आणि राजकारण करणार्‍यांना प्राधान्य दिले जात असल्याची खंत व्यक्त करणार्‍या थरवळ या जेष्ठ शिवसैनिकाने लिहिलेले पत्र वेगाने प्रसारित होत आहे. शिवसैनिक ते जिल्हाप्रमुख अशी 44 वर्षे संघटनेसाठी दिली. पण आज जेव्हा डोंबिवलीचं विधानसभेत प्रतिनिधित्व करण्याची संधी आली तेव्हा एकनिष्ठपणा, संघटनेतील काम, सामाजिक कार्य यावर स्वार्थी राजकारण आणि पैसा सरस ठरलं याबद्दल त्यांनी स्पष्टपणे नाराजी व्यक्त केली तेव्हा त्यांचा थेट रोख शिवसेनेच्या वरिष्ठ नेतृत्वावर होता.