Thane Politics | हम भी है जोश में... मुख्यमंत्री शिंदे - दिघे रॅली आमने - सामने

ठाणे : विधानसभा निवडणूक प्रचाराच्या अखेरच्या दिवशी ठाणे जिल्ह्यात बाईक रॅली काढून सर्व पक्षीय उमेदवारांनी मतदारांपर्यंत पोहचण्याचा प्रयत्न केला. मुख्यमंत्री एकनाथ शिंदे, आमदार प्रताप सरनाईक, आमदार संजय केळकर. आमदार जितेंद्र आव्हाड, अविनाश जाधव, केदार दिघे, नरेश मणेरा यांच्यासह बहुतेक उमेदवारांनी जोरदार प्रचार केला.

‘शिवसेनेचे ठाणे आणि ठाण्याची शिवसेना’, अशी ठाण्याची ओळख असलेल्या ठाण्यातील कोपरी-पाचपाखाडी विधानसभा मतदारसंघामधून मुख्यमंत्री एकनाथ शिंदे हे चौथ्यांदा निवडणूक लढवित आहेत. त्यांच्याविरोधात धर्मवीर आनंद दिघे यांचे पुतणे केदार दिघे हे ठाकरे गटातर्फे निवडणूक लढवीत आहेत. यामुळे या मतदारसंघात शिंदे विरुद्ध दिघे असा सामना रंगला आहे.

एकनाथ नसता तर हे शक्य होत का ? या टॅगलाईनने सोशल मीडियावर कॅम्पेन सुरु असून केदार दिघे यांच्या दिघे आडनावाचा करिष्मा ही प्रचारात दिसून येत आहे. गेल्या काही दिवसांपासून दोन्ही गटाकडून मात्र कोणत्याही वादाविना प्रचार सुरू असतानाच निवडणूक प्रचाराच्या अखेरच्या दिवशी दुपारी दोन्ही गट आमने-सामने आल्याचे चित्र दिसून आले. कोपरी येथील अष्टविनायक चौकात शिंदेच्या शिवसेनेचे कार्यकर्ते दुचाकी रॅलीसाठी जमले होते.

रॅलीदरम्यान, ठाकरे गटाचे उमेदवार केदार दिघे यांची दुचाकी रॅली येथून जात होती. दोन्ही गट आमने-सामने आल्यानंतर दोन्ही बाजूंनी घोषणाबाजी सुरू झाली. "केदार दिघे आगे बडो..आयेगी तो मशालही", अशा घोषणा ठाकरे गटाकडून देण्यात येत होत्या. तर, "एकनाथ शिंदे आगे बडो हम तुम्हारे साथ है, आयेगा तो धनुष्यबाणही" अशा घोषणा शिंदेच्या शिवसेनेकडून देण्यात येत होत्या. घोषणाबाजीमुळे परिसरात काहीकाळ तणावाचे वातावरण होते.