Vidhansabha Election 2024 | वेध मुंब्रा-कळवा विधानसभा मतदारसंघाचा

महाराष्ट्रातील महत्वाच्या विधानसभेच्या लढतीमधील महत्वाची लढत होत असलेल्या मुंब्रा-कळवा मतदार संघांच्या निवडणुकीकडेही महाराष्ट्राचे लक्ष लागले आहे. मराठी, आगरी आणि मुस्लिम बहुल मतदार संघ असलेल्या मतदार संघात गेली अनेक वर्ष जितेंद्र आव्हाड हे निवडणून येत आहेत. यावेळी त्यांचेच एकेकाळीचे सहकारी असलेले ठाणे महापालिकेचे माजी नगरसेवक नजीब मुल्ला यांनी त्यांना आव्हान दिले असले तरी, गेल्या पंधरा वर्षात कळवा आणि मुंब्र्यात केलेल्या विकासकामांच्या जोरावर जितेंद्र आव्हाड यांचे पारडे जड मानले जात आहे. मनसेकडून ॲड. सुशांत सूर्यराव रिंगणात असले तरी त्यांचा प्रभाव कळव्यातील काही भाग वगळता मुंब्र्यात काहीच नसल्याने या ठिकणी दुरंगी लढत होणार असल्याचे निश्चित मानले जात आहे.

राष्ट्रवादी काँग्रेसचे विधानपरिषद सदस्य असलेले जितेंद्र आव्हाड हे 2009 साली पहिल्यांदा कळवा मुंब्र्यातून विधानसभा निवडणुकीसाठी उभे राहिले. तोपर्यंत मुंब्रा काँग्रेसचा गड म्हणून ओळखला जात होता. पहिल्याच निवडणुकीत जितेंद्र आव्हाड यांना 61 हजार 510 तर त्यांचे प्रतिस्पर्धी शिवसेनेचे राजन किणे यांना 45 हजार 821 तर मनसेचे प्रशांत पवार यांना 15 हजार 119 मतं मिळाली होती. त्या निवडणुकीत 15 हजार 895 मतांनी विजयी झाले होते. 2014 च्या दुसर्‍या निवडणुकीत आव्हाड यांना 86 हजार 531 त्यांच्या विरोधात शिवसेनेचे दशरथ पाटील याना 38 हजार 850, भाजपचे अशोक भोईर यांना 12 हजार 881 तर एमआयएमचे अशरफ मुलांनी यांना 16 हजार 375 मतं मिळाली होती, तेव्हा आव्हाड 47 हजार 683 मतांनी विजयी झाले होते. 2019 साली जितेंद्र आव्हाड यांना 1 लाख 9 हजार 213, शिवसेनेच्या दीपाली सय्यद यांना 33 हजार 644 तर आपच्या उमेदवाराला 30 हजार 543 मतं मिळाली होती. त्या निवडणुकीत 75 हजार 634 मतांनी विजयी झाले होते. त्यामुळे गेल्या तीन टर्मच्या निवडणूकीत जितेंद्र आव्हाड यांचे मताधिक्य कमी न होता ते वाढले आहे. यंदा चवथ्यांदा आव्हाड निवडणुकीच्या मैदानात उतरले असून त्यांच्या विरोधात त्यांचेच एकेकाळचे सहकारी नजीब मुल्ला यांनी त्यांना आव्हान दिले आहे. नजीब मुल्ला हे जितेंद्र आव्हाड यांचे कट्टर समर्थक म्हणून ओळखले जायचे. त्याचमुळे त्यांची ठाणे शहर अध्यक्षपदी नियुक्त करण्यात आली होती. दुसरीकडे राष्ट्रवादीत फूट पडल्यानंतर ते अजितदादा यांच्या सोबत गेल्याने त्यांनाच जितेंद्र आव्हाडांच्या समोर अजितदादांच्या राष्ट्र्वादीने उमेदवारी दिली आहे.

राष्ट्रवादीच्या फुटीनंतर कळवा मुंब्र्यातील बहुतांश नगरसेवक हे जितेंद्र आव्हाड यांच्या सोबतच आहेत. दुसरीकडे लोकसभेत भाजप कडून अँटी मुस्लिम भूमिका घेतली गेल्याने याचा फटका जसा लोकसभेला बसला तसाच फटका विधानसभेच्या निवडणुकीत महायुतीला बसण्याची जास्त शक्यता आहे. त्यामुळेच लोकसभा निवडणुकीत महाविकास आघाडीच्या उमेदवार वैशाली दरेकर यांना कळवा मुंब्र्यातून चांगली मते मिळाली होती. दुसरीकडे 2009 साली या मतदारसंघातून मनसेचे प्रशांत पवार यांनी 15 हजार 119 मते मिळाली होती. राज ठाकरे यांना मानणारा एक वर्ग कळव्यात असून त्यांनी दिलेला उमेदवार सुशांत सूर्यराव किती मतं घेणार याकडेही सर्वांचे लक्ष लागले आहेत.