تھانے ضلع میں انتخابات کی تیاریوں کا جائزہ – خصوصی الیکشن انس پکٹر بی آر بال کرشنن کی ہدایات

تھانے ضلع میں انتخابات کی تیاریوں کا جائزہ – خصوصی الیکشن انسپکٹر بی آر بال کرشنن کی ہدایات
تھانے (آفتاب شیخ)
20 نومبر 2024 کو ہونے والے ریاستی اسمبلی کے عام انتخابات کے پیش نظر الیکشن کمیشن کی جانب سے مقرر کردہ خصوصی الیکشن انسپکٹر بی آر بال کرشنن نے آج تھانے ڈسٹرکٹ مجسٹریٹ کے دفتر میں ایک اجلاس منعقد کیا اور انتخابی تیاریوں کا تفصیلی جائزہ لیا۔ تھانے ضلع کو ریاست میں ایک اہم مقام حاصل ہے، جس کی وجہ سے یہاں کے تمام 18 اسمبلی حلقوں میں پرامن انتخابات کے انعقاد کو یقینی بنانے کے لیے انسپکٹر نے تمام متعلقہ حکام کو چوکنا اور ہم آہنگی سے کام کرنے کی ہدایت کی۔
اس اجلاس میں ضلع مجسٹریٹ اور الیکشن افسر اشوک شنگارے، تھانے پولیس کمشنر آشوتوش ڈمبیرے، دیگر پولیس افسران اور انتخابات کے لیے نامزد مرکزی اخراجات کے نگران اور ضلع کے نوڈل افسران بھی شریک ہوئے۔
انسپکٹر بی آر بال کرشنن نے اجلاس میں پولیس، ایس ایس ٹی اور ایف ایس ٹی کی اب تک کی گئی کارروائی کا بھی جائزہ لیا، جس میں غیر قانونی شراب، نقدی اور دیگر انتخابی مواد کی ضبطی شامل تھی۔ انہوں نے تمام دستاویزات اور کارروائی کا ڈیٹا بیس تیار کرنے کی بھی ہدایت دی۔
بی آر بال کرشنن نے مزید کہا کہ تھانے میں گوا اور دمن سے آنے والی غیر قانونی شراب کی روک تھام اور مقامی غیر قانونی کاروبار پر کارروائی کے دوران ڈرون کا استعمال کیا جائے۔ اس کے علاوہ، ریلوے اسٹیشنوں پر جاری تلاشی اور مشتبہ مسافروں کی جانچ کا عمل بھی جاری رکھنے کی تاکید کی گئی۔
اجلاس کے دوران انہوں نے سی-وِجل پر موصول ہونے والی شکایات کے حل اور ووٹنگ کے فیصد میں اضافے کے لیے بیداری مہم کو مزید فعال کرنے کی ضرورت پر زور دیا۔