غیر ملکی میڈیکل گریجویٹس | مشاہرہ کی عدم ادائیگی سے پریشان

عظمیٰ نیوز سروس
سرینگر//نیشنل میڈیکل کمیشن اور سپریم کورٹ کے رہنما خطوط کے باوجود، غیر ملکی میڈیکل گریجویٹس ،جو اس وقت جموں و کشمیر کے سرکاری میڈیکل کالجوں میں اپنی انٹرن شپ کر رہے ہیں، ابھی تک ان کا وظیفہ ادا نہیںکیا گیاہے۔ان کا کہنا تھا کہ، یہ مسئلہ ابھی تک حل نہیں ہوا، جس سے بہت سے میڈیکل گریجویٹس پیسوں کے لیے جدوجہد کر رہے ہیں۔متعدد ایف ایم جی انٹرنز نے بتایا”ہمیں اپنی انٹرن شپ شروع کیے چھ ماہ ہوچکے ہیں، اور ہندوستانی میڈیکل کالجوں سے ہمارے ساتھیوں کی طرح کوشش کرنے کے باوجود، ہمیں وظیفہ کے طور پر ایک روپیہ بھی نہیں ملا ہے، یہ قومی رہنما خطوط کی براہ راست خلاف ورزی ہے،” ۔انہوں نے کہاکہ وزیر اعلیٰ اور وزیر صحت اور طبی تعلیم سے ملاقات کے باوجودمعاملہ ابھی جوں کا توں ہے۔ایک طالب علم نے کہا، “ہمارا مسئلہ افسر شاہی سے متاثر ہوا ہے جس میں کوئی پیش رفت نظر نہیں آتی ہے۔”انٹرن ڈاکٹروں نے کہا کہ NMC کے رہنما خطوط اور سپریم کورٹ کے احکام کے باوجود جموں کشمیرمیں طبی ادارے ان کے مسئلے کو نظر انداز کر رہے ہیں۔انٹرنس نے انتظامیہ پر زور دیا کہ وہ اس معاملے پر بروقت کارروائی کرے۔