وادی میں منفی شبانہ درجہ حرارت برقرار

عظمیٰ نیوز سروس

سرینگر// ابر آلود صورتحال کی وجہ سے پورے کشمیر میں رات کے درجہ حرارت میں اضافہ دیکھا گیا ہے کیونکہ محکمہ موسمیات نے کہا کہ کمزور مغربی ہوائوں کا مرحلہ جمعہ سے مرکزی زیر انتظام علاقہ کو متاثر کرے گا اور ممکنہ طور پر میدانی علاقوں میں بارش اور وادی کے بالائی علاقوں میں ہلکی برف باری کا امکان ہے۔ عہدیداروں نے بتایا کہ وادی کشمیر میں رات کے درجہ حرارت میں بہتری آئی، لیکن زیادہ تر مقامات پر کم از کم درجہ حرارت نقطہ انجماد سے نیچے رہا۔انہوں نے بتایا کہ سرینگر میں کم سے کم درجہ حرارت منفی 1 ڈگری سیلسیس ریکارڈ کیا گیا، جو گزشتہ رات منفی 2.1 ڈگری تھا۔قاضی گنڈ میں منفی 1.8 ڈگری سیلسیس ریکارڈ کیا گیا۔پہلگام میں کم از کم منفی 3.4 ڈگری سیلسیس پر طے ہوا ۔گلمرگ میں کم سے کم درجہ حرارت صفر ڈگری جبکہ کپواڑہ میں منفی 0.4 ڈگری سیلسیس درج کیا گیا۔حکام نے بتایا کہ کوکرناگ وادی کا واحد موسمی مرکز تھا جہاں کم از کم درجہ حرارت نقطہ انجماد سے اوپر 0.6 ڈگری سیلسیس پر طے ہوا۔محکمہ موسمیات نے کہا کہ جمعہ کی شام سے جموں و کشمیر پر ایک بار پھر مغربی رکاوٹیں آنے کے امکانات ہیں۔ جمعہ کی شام سے ہفتہ کی صبح تک وادی کے بالائی علاقوں میں خاص طور پر الگ تھلگ مقامات پر ہلکی بارش یا برفباری کا امکان ہے۔یکم دسمبر کو، موسم جزوی طور پر ابر آلود رہے گا اور اونچے علاقوں میں الگ تھلگ مقامات پر ہلکی بارش/ہلکی برف باری ہوگی۔2 دسمبر سے، بالائی علاقوں میں دو دن کے دوران بکھرے ہوئے مقامات پر ہلکی بارش یا برفباری کے امکانات ہیں۔محکمہ موسمیات نے کہا کہ 4 سے 7 دسمبر تک موسم عام طور پر خشک رہنے کا امکان ہے، جس کے بعد 8 دسمبر سے دو دن کے دوران اونچائی والے علاقوں میں الگ تھلگ مقامات پر ہلکی بارش یا ہلکی برفباری کا امکان ہے۔