پولیس کانسٹیبل اِمتحانات یکم دسمبر سے||4ہزاراسامیاں،5.5لاکھ امیدوار

عظمیٰ نیوز سروس

جموں//چیف سیکرٹری اَتل ڈولو نے جموں و کشمیر سروسز سلیکشن ریکروٹمنٹ بورڈ (ایس ایس آر بی) کے ذریعے پولیس میں کانسٹیبلوں کے اِنتخاب کے لئے اِمتحانات منعقد کرنے کے لئے ضلع ترقیاتی کمشنروںکی تیاریوں کا جائزہ لینے کے لئے کل سول اِنتظامیہ اور محکمہ پولیس کے ایک میٹنگ کی صدارت کی۔چیئرپرسن جموں و کشمیر سروسز سلیکشن ریکروٹمنٹ بورڈ (ایس ایس آر بی) اِندو کنول چب نے میٹنگ کو جانکاری دی کہ یکم؍ دسمبر سے 22؍دسمبر 2024ء تک محکمہ داخلہ (ہوم ڈیپارٹمنٹ) میں کانسٹیبلوں کی 4,002 اَسامیوں کے اِمتحانات میں 5,59,135 اُمیدوار شریک ہوں گے۔چیف سیکرٹری نے اَفسروں پر زور دیا کہ وہ عملے کی تعیناتی کے سلسلے میں مناسب اِنتظامات کریں جن میں مبصرین، سپروائزروں، اِن وِیجلی لیٹروں اور دیگر پرسنل شامل ہیں۔اُنہوں نے ضلع ترقیاتی کمشنروں پر زور دیا کہ وہ زیادہ سے زیادہ اِمتحانی مراکز کا دورہ کریں اور اَپنے اَضلاع میں قائم تمام اِمتحانی مراکز کا معائینہ کرنے کے لئے ضلعی اِنتظامیہ میں سینئر اَفسران کی سربراہی میں ٹیمیں تشکیل دیں۔ اُنہوں نے اُنہیں اِس بات کو یقینی بنانے کے لئے حساس بنایا کہ کہیں بھی نقل یا بداِنتظامی کا کوئی ناخوشگوار واقعہ پیش نہ آئے اور ضلع کے ہر مرکز پر کافی تعداد میں سیکورٹی اہلکاروں کی تعیناتی کا حکم دیا۔چیف سیکرٹری نے اِن سے حساس اور غیر حساس اِمتحانی مواد اِمتحانی مراکز تک پہنچانے کے اِنتظامات کے بارے میں دریافت کیا۔ اُنہوں نے اُ ن سے یہ بھی کہا کہ وہ اِس پورے عمل کی ذاتی طور پر نگرانی کریں جب تک کہ او ایم آر شیٹس کو محکمہ پولیس کے ذریعے ایس ایس آر بی کو واپس نہیں بھیج دیا جاتا ہے۔چیئرپرسن ایس ایس آر بی نے کہا کہ کانسٹیبلوں (ایگزیکٹیو / آرمڈ / ایس ڈِی آر ایف) کے اِمتحانات یکم ؍دسمبر کو ضلع بھر کے 856 مراکز پر منعقد ہونے جا رہے ہیں جس کے لئے جموںوکشمیر یوٹی میں 2,62,863اُمیدوار شرکت کریں گے جس میں سب سے زیادہ 54,296اُمیدوار جموں ضلع کے شامل ہوں گے۔اِسی طرح کانسٹیبل (ٹیلی کمیونی کیشن) کے 1,67,609 اُمیدواروں کے اِمتحانات 8؍دسمبر کو اور 1,28,663 کانسٹیبل (فوٹوگرافر) اُمیدواروں کے اِمتحانات اس سال 22 ؍دسمبر کو ہوں گے۔چیئرپرسن نے بورڈ کی طرف سے بھیجے گئے مواد اور ان کی طرف سے کئے گئے دیگر اِنتظامات کے بارے میں بھی جانکاری دِی۔ یہ بات سامنے آئی کہ پہلی بار ہر سینٹر میں مرد اور خواتین گزیٹیڈ افسران کو بطور ’’فریکنگ سپروائزر‘‘ تعینات کیا گیا ہے۔ اِس کے علاوہ اِمتحانات کی ویڈیوگرافی کو یقینی بنایا گیا ہے تاکہ معاملے کی تکمیل میں شفافیت کو یقینی بنایا جاسکے۔