उरणमध्ये चड्डी-बनयान गँगचा हैदोस, 25 लाख लंपास, सीसीटीव्हीत चोरटे कैद

थंडीची चाहूल लागायला नुकतीच सुरुवात झाली आहे आणि अशातच उरण तालुक्यावर एक मोठं संकट घोंघावत आहे. उरण तालुक्यात चोरट्यांनी अक्षरशः धुमाकूळ घातलाय. उरण तालुक्यात रात्रीच्या दाट अंधाराचा फायदा चोरांनी घेतलाय. उरणच्या वेश्वी गावातील चार घरांमध्ये अज्ञात चोरांनी घरफोड्या केल्या. अज्ञात चोरट्यांनी बंद घरांच्या कड्या आणि खिडक्यांचे लॉक तोडून घरात प्रवेश करत, कपाटातून अंदाजे २५ लाखांचा ऐवज लंपास केला. या संपूर्ण घटनेचा खळबळजनक व्हिडिओ सीसीटीव्ही कॅमेरात कैद झाला असून, घरमालकांनी पोलिसांना तत्काळ सूचित केले. संबंधित घटना ही गुरुवारी 28 नोव्हेंबरच्या रात्री घडली.

गेल्या वर्षी देखील उरण तालुक्यात घरफोड्यांच्या घटनांमध्ये वाढ झाल्याचे दिसून आले होते. त्यामुळे पोलिसांसोबतच गावकऱ्यांनी देखील जागते रहो हा नारा दिला होता. वर्षापूर्वीच काही संतप्त नागरिकांनी चोरीसाठी वापरली जाणारी गाडी सुद्धा जाळून टाकली होती. मात्र त्यावेळी चोरट्यांनी अंधाराचा फायदा घेऊन पळ काढल्याने ते थोडक्यात बचावले होते. मात्र आता एक वर्षानंतर पुन्हा, थंडीची चाहूल लागली आणि चड्डी-बनयान गँगने उरणकडे आपला मोर्चा वळविला आहे.

हे सुद्धा वाचा

नेमकं काय घडलं?

मिळालेल्या माहितीनुसार, गुरुवारी रात्री वेश्वी गावात या चोरट्यांनी थंडीचा फायदा घेत, घरांच्या कड्या आणि खिडक्यांचे लॉक तोडून घरात प्रवेश केला. प्रभाकर पाटील, शशिकांत मुंबईकर, हसुराम मुंबईकर आणि राज सागर मुंबईकर या चार रहिवाशांच्या घरांमध्ये चोरी झाली आहे. चोरट्यांच्या या धाडसामुळे गावात एकच खळबळ उडाली आहे. चोरट्यांच्या वाढत्या घरफोडीच्या घटनेने संपूर्ण गावात तणावाचे वातावरण निर्माण झाले आहे. घरांमध्ये सुरक्षेसाठी सर्वजण सजग झाले आहेत, आणि पोलिस यंत्रणा देखील घटनेचा तपास करत आहेत.