कराड दक्षिणेत अतुलपर्व; पृथ्वीराज चव्हाणांवर नामुष्की

कराड दक्षिण विधानसभा मतदारसंघात बुधवारी 76.32 टक्के मतदान झाले होते. मतदानानंतर काँग्रेसचा बालेकिल्ला अबाधित ठेवण्यात यश येईल असा दावा काँग्रेसकडून केला जात होता. तर सुमारे 8 ते 10 हजारांनी विजय मिळेल असा विश्वास भाजपाकडून केला जात होता. शनिवारी प्रत्यक्षात मतमोजणीस प्रारंभ झाल्यानंतर पहिल्या फेरीपासून डॉ. अतुलबाबा भोसले यांनी आघाडी घेतली आणि ही आघाडी शेवटपर्यंत कायम होती. आमदार पृथ्वीराज चव्हाण यांना सुमारे 1 लाख 409 मते मिळाली आहेत. तर डॉ. अतुलबाबांना 1 लाख 39 हजार 904 मते मिळाली असून सुमारे 38 हजार 364 मतांनी त्यांनी आमदार पृथ्वीराज चव्हाण यांचा पराभव केला आहे.

देशाला स्वातंत्र्य मिळाल्यानंतर मागील सात दशकांमध्ये प्रत्येक विधानसभा निवडणुकीत काँग्रेस उमेदवारांनी मोठ्या मताधिक्याने विजय मिळविला होता. मागील दोन विधानसभा निवडणुकीत माजी मुख्यमंत्री आमदार पृथ्वीराज चव्हाण यांनी कराड दक्षिण विधानसभा मतदारसंघाचे विधानसभेत प्रतिनिधीत्व केले होते. तर त्यापूर्वी 1980 च्या दशकापासून सन 2014 पर्यंत स्व. विलासराव पाटील उंडाळकर यांनी सलग 35 वर्ष विधानसभेत प्रतिनिधीत्व केले होते. त्यापूर्वी स्वातंत्र्यापासून 1980 पर्यंत स्व. यशवंतराव मोहिते यांनी सलग सहा काँग्रेसचे उमेदवार म्हणून विजय मिळविला होता.