चहा घेण्यासाठी हॉटेलमध्ये गेलो होतो; सीसीटीव्ही तपासा: विनोद तावडेंकडून आरोपांचे खंडन

मुंबई: पुढारी वृत्तसेवा: विरार येथे बहुजन विकास आघाडीच्या कार्यकर्त्यांनी भाजपचे राष्ट्रीय सरचिटणीस विनोद तावडे यांच्यावर पैसे वाटप केल्याचा आरोप केला होता. या घटनेमुळे वातावरण तणावपूर्ण बनले होते. तर यावर विरोधकांकडून तीव्र प्रतिक्रिया उमटू लागल्या आहेत. दरम्यान, तावडे यांनी पत्रकारांशी बोलताना आरोपांचे खंडन करत मी हॉटेलमध्ये चहा घेण्यासाठी गेलो होतो. कुणालाही पैसे वाटलेले नाहीत. सीसीटीव्ही तपासा, असे म्हटले आहे. मुख्यमंत्री पदाच्या शर्य़तीबाबत प्रतिक्रिया देताना ते म्हणाले की, 'ओन्ली राष्ट्र नो महाराष्ट्र'.

याबाबत दिलेल्या निवेदनात त्यांनी म्हटले आहे की, वाडा येथून आज मी मुंबईला परतत असताना वसई परिसरात आल्यावर स्थानिक भाजपा उमेदवार राजन नाईक यांना चौकशीसाठी फोन केला. आम्ही सर्व कार्यकर्ते वसई येथे एका हॉटेलमध्ये आहोत, आपण चहाला या, असे त्यांनी सांगितले. मी तेथे पोहोचल्यावर स्वाभाविकपणे निवडणुकीची चर्चा झाली. मतदानाच्या दिवशीची तांत्रिक प्रक्रिया व आपण घ्यायची काळजी याविषयी मी बोलत होतो. त्यावेळी अचानक काही कार्यकर्ते आले व त्यांनी माझ्याभोवती कोंडाळे करून आरडाओरडा सुरू केला. हे कार्यकर्ते बहुजन विकास आघाडीचे असल्याचे समजल्यानंतर मी त्या पक्षाचे प्रमुख हितेंद्र ठाकूर यांना फोन केला. आणि आपल्या पक्षाच्या कार्यकर्त्यांना आवरावे, अशी विनंती केली.

त्यानंतर हितेंद्र ठाकूर व आमदार क्षितीज ठाकूर तेथे आले. त्या दोघांशी बोलणे झाल्यावर त्यांच्यासोबत मी एकाच गाडीतून बाहेर पडलो. हा सर्व घटनाक्रम सीसीटीव्हीमध्ये टिपला गेला आहे. मी केवळ भाजपा कार्यकर्त्यांसोबत चहापानासाठी गेलो होतो. व चर्चा करत होतो. त्यावेळी माझ्याकडून पैसे वाटप होण्याचा प्रश्नच उद्भवत नाही. या संदर्भातील सीसीटीव्ही चित्रण तपासावे म्हणजे दूध का दूध, पानी का पानी, स्पष्ट होईल.

काँग्रेस नेते व विरोधी पक्षनेते राहुल गांधी व राष्ट्रवादी काँग्रेस शरदचंद्र पवार पक्षाचे खासदार सुप्रिया सुळे यांच्यासह टीका करणाऱ्या नेत्यांनी वस्तुस्थिती समजून घ्यावी. तसेच याबाबतीत निवडणूक आयोगाकडून निःपक्ष चौकशी व्हावी, अशी मागणी तावडे यांनी केली आहे.