जल्लोष, आवाज युवा सेनेचाच! सिनेट निवडणुकीत दहाही जागांवर दणदणीत विजय

मुंबई विद्यापीठ पदवीधर मतदारसंघाच्या सिनेट निवडणुकीत पुन्हा एकदा युवा सेनेने दहापैकी दहा जागा जिंकल्या. शिवसेना पक्षप्रमुख उद्धव ठाकरे यांच्या मार्गदर्शनाखाली शिवसेना नेते, युवसेना प्रमुख आदित्य ठाकरे यांच्या नेतृत्वाखाली निवडणूक रिंगणात उतरलेल्या युवासेनेच्या 10 शिलेदारांनी सिनेटवर दणदणीत विजय मिळविला. या विजयाने पदवीधर मतदारसंघात भगव्याचीच शान आणि वर्चस्व कायम असल्याचे सिद्ध झाले. हा विजय विधानसभा आणि मुंबई महापालिकेच्या निवडणुकीतील विजयाची नांदी मानली जात आहे.

युवा सेनेच्या शिलेदारांनी भाजपप्रणित अखिल भारतीय विद्यार्थी परिषदेचा धुव्वा उडविला. सिनेटच्या मागील निवडणुकीतही युवासेना प्रमुख आदित्य ठाकरे यांच्याच नेतृत्वाची जादू चालली होती आणि युवा सेनेने दहाही जागांवर विजय पटकावला होता.