'तो' यायचा अन् पैसे वाटायचा; दीड हजारात मत विकत घेणारा अटकेत

छत्रपती संभाजीनगर, पुढारी वृत्तसेवा : विधानसभा निवडणुकीचा प्रचार कालावधी संपताच पैशाचा खेळ सुरू झाल्याचा प्रकार समोर आला आहे. दीड हजार रुपयांमध्ये मत विकत घेणाऱ्याला जवाहरनगर पोलिसांनी अटक केली. त्याच्यासोबत मतांसाठी पैसे घेणाऱ्यालासुद्धा ताब्यात घेण्यात आले. ही कारवाई इंदिरानगर भागात सोमवारी (दि.१८) रात्री साडेआठच्या सुमारास करण्यात आली. अशोक रामभाऊ बाकोडे (४२, रा. शंभूनगर) असे पैसे वाटणाऱ्याचे तर नदीम पठाण असे पैसे घेणार्याचे नाव आहे.

पोलिसांनी दिलेल्या माहितीनुसार, इंदिरानगर भागात एकजण पैसे वाटप करून मतदान विकत घेत असल्याची माहिती प्राप्त झाली होती. परिमंडळ दोनचे पोलिस उपायुक्त नवनीत कॉवत यांना एका नागरिकाने तीन दिवसांपूर्वी आमच्या भागात मतदानासाठी पैसे वाटप करून गेलेला परत आला आहे, असा मेसेज टाकून तो बसलेल्या ठिकाणचा व्हिडीओ पाठविला. व्हिडीओ मिळताच अवघ्या १० मिनिटांत कॉवत यांनी तत्काळ जवाहरनगर पोलिस ठाण्याचे निरीक्षक शरमाळे सांगून कारवाईच्या सूचना दिल्या. तसेच एफएसटी पथकालादेखील पाचारण करण्यात आले. दोघांनी मिळून वाकोडे याला ताब्यात घेऊन पोलिस ठाण्यात आणले. याप्रकरणी भरारी पथकाचे सागर गोरे यांच्या तक्रारीवरून जवाहरनगर पोलिसांत रात्री उशिरापर्यंत गुन्हा दाखल करण्याची प्रक्रिया सुरू होती.