दहिहंडा-दर्यापूर रस्त्यावर जीवघेणे खड्डे; अपघाताची मालिका थांबेना:ट्रकच्या धक्क्याने दुचाकीवरून पडून महिला जखमी‎

दहिहंडा ते दर्यापूर रस्त्यावर जागोजागी जीवघेणे खड्डे पडल्याने वाहनधारक वैतागले आहेत. रस्त्याची झालेली दयनीय अवस्था जीवघेणी ठरत आहे. मोठमोठे खड्डे आणि उखडलेली गिट्टी यामुळे वाहनाला अपघात होण्याचे प्रकार वाढले आहेत. शिवाय हाती घेण्यात आलेली रस्त्याची डागडुजीचे कामेही दर्जाहीन झाल्याने हा रस्ता सध्या नागरिकांच्या जीवावर उठला आहे. दहिहंडा ते दर्यापूर रस्ता खड्डेमय झाला असून, या रस्त्यावर गुरुवारी ट्रक आणि दुचाकीचा अपघात घडला. या अपघातात ट्रकची दुचाकीला धडक बसल्याने दुचाकीवरील महिला खाली रस्त्यावर पडली. सुदैवाने तिला फारसे लागले नाही. मात्र बांधकाम विभाग आणखी काय मोठ्या अपघाताची वाट बघत आहे का, असा प्रश्न नागरिकांमधून उपस्थित केला जात आहे. तर ग्रामीणमधील बहुतांश रस्त्यांची परिस्थिती सारखीच आहे. जागोजागी तीन ते चार फूट रुंद आणि अर्धा फूट खोलपर्यंत खड्डे पडलेले आहेत. अशा रस्त्यांवरून मोठी वाहने, तर दुचाकींनाही मार्ग काढताना तारेवरची कसरत करावी लागत आहे. एसटी, प्रवासी वाहतूक करणाऱ्या वाहनांची ग्रामीण भागातील रस्त्यावर सतत वर्दळ असते. मात्र, प्रत्येक ठिकाणी उसळणाऱ्या वाहनांमुळे प्रवाशांना शारीरिक त्रास सहन करावा लागत आहे. ग्रामीण भागातील अनेक विद्यार्थी गावापासून दहिहंडा वरून दर्यापूर येथे जवळ असल्यामुळे शाळेमध्ये शिक्षणासाठी त्यांना यावे लागत आहे. रस्त्यावर असलेल्या खड्यांमुळे त्यांना आपल्या शिक्षणासाठी एसटी बसेस व खासगी बसेसमधून व शाळेच्या वाहनात खड्डेमय रस्त्यातून धक्के खात प्रवास करावा लागत आहे. दहिहंडा ते दर्यापूर या रस्त्यावर जागोजागी खड्डे पडल्याने दुचाकी व मोठे वाहन चालवता येत नाही. रस्त्याच्या जागोजागी खड्डे पडले आहेत. या मुळे आमच्या गाडीसोबत आमच्या हाडांची कसरत होत आहे. या रस्त्यावर कधी अपघात घडेल सांगता येत नाही. - प्रवीण पोटे, वाहनधारक, दहीहंडा खड्डेमय रस्त्यातून झटके खात करावा लागतो प्रवास दहिहंडावरुन दर्यापूरला जाताना परिसरातील गावातील विद्यार्थी शिक्षणाकरिता दर्यापूरला जातात. त्याच खड्डेमय रस्त्यावरुन विद्यार्थ्यांना बसमध्ये झटके खात प्रवास करावा लागतो. प्रशासनाने लवकरात लवकर दखल घ्यावी आणि समस्या सोडवावी. - निलेश जैन, नागरिक, दहीहंडा.