पुलाची शिरोलीत सातपुते - कोळी गटात राडा

शिरोली एमआयडीसी : शिरोली येथे पूर्ववैमनस्यातून दोन गटात हाणामारी झाल्याचा प्रकार घडला. आपल्या विरोधी गटाचा एक जण नागाव येथे येणार असल्याचा सुगावा लागताच दहा ते बारा जणांच्या टोळीने काठ्या व दगडफेक करत त्याच्यावर हल्ला केला. यामध्ये तो किरकोळ जखमी झाला.

पुलाची शिरोली येथील सातपुते व कोळी दोन्ही गटात गेल्या काही वर्षांत टोळी युद्ध सुरू आहे. दोन्ही गट एकमेकाच्या जिवावर उठले आहेत . यातुनच गुरूवारी रात्री नागाव येथील चौगुले कॉलनी येथे ही घटना घडली. पोलिसांनी वेळीच धाव घेतल्याने दोन्ही गटाच्या लोकांनी घटनास्थळावरून पळ काढला . शिरोलीतील या दोन्ही टोळ्यांमध्ये टोळी युद्ध भडकण्याची शक्यता नाकारता येत नाही. रात्री पोलिसांत तक्रार दाखल झाली आहे. पुढील तपास सहाय्यक पोलिस निरीक्षक सुनील गायकवाड करीत आहेत.