पोटनिवडणुकीत उत्तर प्रदेशमध्‍ये भाजप, पश्‍चिम बंगालमध्‍ये 'तृणमूल'चे वर्चस्‍व

नवी दिल्ली, पुढारी वृत्तसेवा : महाराष्‍ट्र आणि झारखंड विधानसभा निवडणूक निकालाबरोबरच देशातील १४ राज्यांच्या ४८ मतदारसंघांमधील पोटनिवडणुकीचे आज (दि.२३) निकाल जाहीर झाले. यामध्ये सर्वाधिक २० विधानसभा मतदारसंघामध्ये भाजपच्या उमेदवारांचा विजय झाला आहे. काँग्रेसला ७ तर तृणमूल काँग्रेसचा ६ मतदारसंघात विजय झाला आहे.

महाराष्ट्र आणि झारखंड विधानसभा निवडणुकीबरोबर देशातील १४ राज्यांमध्ये ४८ मतदारसंघात विधानसभेची पोटनिवडणूक झाली. त्यांपैकी सर्वात जास्त ९ विधानसभेच्या जागांवर उत्तर प्रदेशात निवडणुक झाली होती. या ९ जागांपैकी ६ जागांवर भाजपच्या उमेदवारांचा विजय झाला आहे. तर समाजवादी पक्षाला २ आणि राष्ट्रीय लोक दल पक्षाला १ जागेवर यश मिळाले आहे.

पश्चिम बंगालच्या ६ विधानसभा मतदारसंघात पोटनिवडणूक झाली. या सर्व जागांवर मुख्यमंत्री ममता बॅनर्जी यांच्या तृणमूल काँग्रेसच्या उमेदवारांचा विजय झाला आहे.

राजस्थानमधील ७ पैकी ५ जागांवर भाजपच्या उमेदवारांचा विजय झाला आहे. तर भारत आदिवासी पक्षाला १ आणि काँग्रेसला १ जागा मिळाली आहे. आसाममध्ये ५ पैकी ३ भाजप, युनीयटेड पीपल्स पक्ष (लिबरल) १ आणि आसाम गण परिषद १ जागेवर विजय झाला. पंजाबमधील ४ पैकी ३ जागांवर आम आदमी पक्ष आणि १ जागेवर काँग्रेसचा विजय झाला आहे. बिहारमध्ये ४ पैकी २ भाजप, १ हिंदुस्तानी अवामी मोर्चा , जनता दल (संयुक्त) १ जागा मिळाली आहे. कर्नाटकच्या ३ जागांवर काँग्रेसला यश मिळाले आहे. मध्य प्रदेशातील २ पैकी १ काँग्रेस आणि १ भाजप, केरळच्या २ पैकी काँग्रेस १ आणि माकप १, विजय मिळाला आहे. तर उत्तराखंड, छत्तीसगढ, गुजरात या राज्यांतील प्रत्येकी १ जागेवर निवडणूक झाली. या तिन्ही राज्यांत भाजपचा विजय झाला आहे. सिक्कीमच्या २ जागांवर सिक्कीम क्रांतीकारी मोर्चाच्या उमेदवारांचा बिनविरोध विजय झाला आहे. तर मेघालयची १ जागा नॅशनल पीपल्स पक्षाला मिळाली आहे.