फडणवीस आज घेणार गडकरी यांचेही आशीर्वाद !

नागपूर : राज्याचे उपमुख्यमंत्री आणि भावी मुख्यमंत्री देवेंद्र फडणवीस यांनी नागपुरातील दक्षिण पश्चिम मतदार संघातून सलग तिसऱ्यांदा मोठा विजय मिळवला आहे. ही त्यांची सहावी निवडणूक आहे. त्यांच्या मातोश्रीने आपला मुलगा मुख्यमंत्री व्हावा, राज्यभरातील लाडक्या बहिणीचे त्याला प्रेम मिळाले, त्याने रात्रीचा दिवस केला. दोन ते तीन तासच तो झोपला अशा भावना व्यक्त केल्या.

स्वतः देवेंद्र फडणवीस नागपुरात कार्यकर्ते जल्लोष साजरा करीत असताना मात्र मुंबईत महायुतीच्या नेत्यांसमवेत होते. आता रात्री फडणवीस स्वतः नागपुरात येत असून विजयी झाल्याचे प्रमाणपत्र ते स्वीकारतील. यानंतर केंद्रीय मंत्री नितीन गडकरी यांच्या निवासस्थानी जाऊन देवेंद्र फडणवीस आशीर्वाद घेणार आहेत. विधानसभा निवडणूक प्रचारात गडकरी यांचा झंजावाती प्रचार देखील महत्त्वाचा ठरला. स्वतः फडणवीस आणि भाजप प्रदेशाध्यक्ष चंद्रशेखर बावनकुळे यांनी गडकरी यांच्या निवासस्थानी जाऊन प्रचार शुभारंभ होण्यापूर्वी त्यांचे आशीर्वाद घेतले होते हे विशेष.(Maharashtra assembly polls)