बुद्धी तल्लख बनवण्यासाठीही अंडी गुणकारी

वॉशिंग्टन : जर तुम्हाला वाढत्या वयाबरोबर आपली स्मरणशक्ती चांगली राखायची असेल तर तुम्ही अंडी खाऊ शकता. युनिव्हर्सिटी ऑफ कॅलिफोर्निया सॅन डीएगोच्या संशोधकांनी एका अभ्यासात सांगितले की नियमित अंडी खाल्ल्याने आपल्या मेंदूचे कार्य योग्य प्रकारे होण्यास मदत होते. अंड्यात असलेली कोलीन, व्हिटामिन्स बी-6,बी-12 आणि फॉलिक अ‍ॅसिड मेंदूचे आरोग्य चांगले राखण्यास मदत करते. विशेषत: महिलांच्या मेंदूच्या आरोग्यासाठी अंडी खूपच लाभदायक असतात.

युसी सॅन दीएगोद्वारे केलेल्या अभ्यासात 55 वर्षांवरील 890 ज्येष्ठांचा समावेश केला गेला. त्यात 357 पुरुष आणि 533 महिला होत्या. या लोकांच्या मेंदूविषयक कार्यावर अंडी खाण्याचा काय प्रभाव होतो हे पाहिले गेले. चार वर्षे हा प्रयोग झाला. त्याचे परिणाम आश्चर्यकारक होते. ज्या महिला अधिक अंडी खात होत्या त्यांची व्हर्बल फ्लुएन्सी (शब्दांचा योग्य आणि वेगाने उच्चार करण्याची क्षमता) चांगली होती. तसेच या महिलांना जनावरे, झाडे आणि अन्य वस्तूंची नावे सांगण्याची क्षमता अधिक होती. तर ज्या महिलांनी कमी किंवा अजिबात अंडी खाल्ली नाहीत त्यांच्यात ही क्षमता कमी होती. पुरुषांच्या बाबतीत मात्र अंडी सेवनाचा कोणताही विशेष स्वरूपातील प्रभाव त्यांच्या मेंदूवर झाला नाही. तरीही अंड्याचे सेवन कोणत्याही लिंगाच्या व्यक्तीवर वाईट परिणाम करीत नाही. हा निष्कर्ष महत्त्वपूर्ण आहे. कारण वाढत्या वयाबरोबर व्यक्तीच्या मेंदूवर परिणाम होतो. विस्मृतीचा आजार या वयात अधिक तापदायक बनलेला असतो. अंडी केवळ मेंदूसाठीच फायदेशीर नाहीत. तर महिलांच्या हाडांच्या मजबूतीसाठी देखील अंडी खाणे चांगले आहे.अंड्यात उच्च कोटीचे प्रोटीन असते. विटामिन्स बी-12, फॉस्फरस आणि सेलेनियम देखील असते. जे शरीराच्या विविध क्रियांना सुधारण्यास मदत करते. ए,बी-12, आणि सेलेनियम रोगप्रतिकारक शक्ती मजबूत बनविण्याचे कार्य करीत असते.