मी नाही त्यातला अन् पैसा बदाबदा ओतला:मतदारांच्या यादीसह नोटांचे बंडल, रोहित पवारांकडून व्हिडिओ शेअर करत राम शिंदेंवर आरोप

राज्यातील हायव्होल्टेज लढतींपैकी एक असलेल्या कर्जत-जामखेड मतदारसंघात भाजपचे उमेदवार राम शिंदे यांच्या नातेवाईकांकडून पैसे वाटप केल्याचा दावा आमदार रोहित पवार यांनी केला आहे. याबाबत रोहित पवार यांनी एक व्हिडिओ शेअर केला आहे. रोहित पवार समर्थकांनी कर्जत येथील एका हॉटेलमधून संबंधित व्यक्तीला लाखो रुपयांच्या रोकडसह पकडल्याचे त्यात दिसत आहे. मी नाही त्यातला अन् पैसा बदाबदा ओतला असाच राम शिंदेंचा अवतार मानावा लागेल, अशी टीका रोहित पवार यांनी केली. रोहित पवार यांनी सांगितले की, भाजप उमेदवार राम शिंदे यांच्यासाठी कर्जतच्या लकी हॉटेलमधून पैसे वाटप केले जात असल्याची माहिती आमच्याकडून दुपारी 2 वाजता प्रशासनाला देऊनही प्रशासनाने त्याकडे जाणीवपूर्वक दुर्लक्ष केले. दोन तासांनी 4 वाजता संबंधित ठिकाणी छापा टाकला. त्याठिकाणी पोलिस बंदोबस्तात पैसे वाटप करताना आमच्या कार्यकर्त्यांनी एका व्यक्तीला रंगेहात पकडले. पैसे वाटप करणारी व्यक्ती ही मंगळवेढा येथील असून राम शिंदे यांचा नातेवाईक असल्याचे सांगत आहे. त्याच्याकडे 5 ते 8 लाख रुपये रोख रकमेसह लाखो रुपयांच्या याद्याही सापडल्या असून हा सर्व ऐवज पोलिसांकडे दिला आहे. याबाबत प्रशासन काय कारवाई करते याकडे आमचे बारकाईने लक्ष आहे, असे रोहित पवार यांनी सांगितले. यावरुन राम शिंदे यांचा अवतार म्हणजे, ‘मी नाही त्यातला अन् पैसा बदाबदा ओतला…’ असाच म्हणावा लागेल, अशी टीका रोहित पवार यांनी केली आहे. रोहित पवारांवरही पैसे वाटल्याचा आरोप दरम्यान, कालच रोहित पवारांशी संबंधित व्यक्तीने पैसे वाटल्याचा आरोप राम शिंदे यांच्या कार्यकर्त्यांनी केला होता. जामखेड तालुक्यातील नान्नज या गावात मधुकर मोहिते हा व्यक्ती पैसे वाटप करत असल्याचा आरोप करणारा व्हिडीओ सोशल मीडियावरही व्हायरल करण्यात आला. या व्यक्तीकडे काही पैसे आणि एक यादी मिळाली होती. संबंधित व्यक्तीकडे 47 हजार रुपये मिळून आले. या घटनेसंदर्भात पोलिसांना माहिती देण्यात आली होती. पोलिसांनी घटनास्थळी दाखल होत चौकशी सुरू केली तर, संबंधित व्यक्ती हा पैसे वाटप करत नसल्याचा दावा रोहित पवारांनी केला. हे ही वाचा... नांदगावात पैसे वाटप करणारी गाडी पकडली:अपक्ष उमेदवाराच्या कार्यकर्त्याने गाडीवर चढत नोटा फाडल्या, पोलिसांकडून वाहन जप्त नांदगाव मतदारसंघात सकाळी सुहास कांदे आणि समीर भुजबळ कार्यकर्त्यांमध्ये मोठा राडा झाला होता. त्यानंतर आता पुन्हा एक धक्कादायक प्रकार समोर आला आहे. नांदगाव मतदारसंघातील साकोरा येथे पैसे वाटप करणारी गाडी पकडली आहे. अपक्ष उमेदवाराच्या कार्यकर्त्यांनी ही गाडी पकडली आहे. गाडी पकडल्यानंतर एका कार्यकर्त्याने गाडीच्या टपावर चढून नोटा फाडल्या आणि उधळल्या. सविस्तर वाचा...