मुंबई मनपा निवडणुकीसाठी सुप्रिया सुळे मैदानात:मुंबई विभागाच्या दोन दिवसीय बैठकीचे आयोजन; पक्षात काही महत्त्वाचे बदल देखील होणार

आगामी काळात होणाऱ्या मुंबई महानगरपालिका निवडणुकीच्या निमित्ताने राष्ट्रवादी काँग्रेस शरदचंद्र पवार पक्षाच्या वतीने मुंबई विभागाच्या बैठकीचे आयोजन करण्यात आले आहे. शरदचंद्र पवार यांच्या कन्या खासदार सुप्रिया सुळे यांच्या उपस्थितीत ही बैठक होणार आहे. सलग दोन दिवस या बैठकींचे सत्र सुरू राहणार आहे. यावेळी बैठकीमध्ये मुंबई महानगरपालिका निवडणुकीच्या संदर्भात सविस्तर चर्चा होणार आहे. स्थानिक स्वराज्य संस्थांच्या निवडणुका या महाविकास आघाडीतील प्रत्येक घटक पक्ष स्वबळावर लढणार असल्याचे बोलले जात आहे. उद्धव ठाकरे यांच्या पक्षाच्या वतीने तशी घोषणा देखील करण्यात आली आहे. मात्र राष्ट्रवादी काँग्रेस शरदचंद्र पवार पक्षाची मुंबई महानगरपालिका निवडणूक ही ठाकरे यांच्या शिवसेनेसोबत लागण्याची इच्छा आहे. पक्षातील पदाधिकारी यांनी कार्यकर्त्यांची हीच भावना आहे. या संदर्भात चर्चा करण्यासाठी या दोन दिवसीय बैठकीचे आयोजन करण्यात आले आहे. या दरम्यान राष्ट्रवादी काँग्रेस शरदचंद्र पवार पक्षात काही महत्त्वाचे बदल देखील होणार असल्याची शक्यता वर्तवली जात आहे. शरद पवार यांचे प्रकृती बरी नसल्यामुळे डॉक्टरांनी त्यांना आराम करण्याचा सल्ला दिला आहे. या पार्श्वभूमीवर खासदार सुप्रिया सुळे यांच्या मार्गदर्शनाखाली मुंबईतील पदाधिकाऱ्यांची ही बैठक होत आहे. या बैठकीमध्ये मुंबईतील स्थानिक स्वराज्य संस्थांच्या निवडणुका संदर्भात सविस्तर चर्चा होणार आहे. या निवडणुकीच्या निमित्ताने पक्ष पुन्हा एकदा ॲक्टिव्ह मोडवर आला असल्याचे पाहायला मिळत आहे. पक्षातील पदाधिकाऱ्यांची भावना आणि सध्याची परिस्थिती पाहता, पक्ष काय निर्णय घेतो? याकडे आता सर्वांचे लक्ष लागले आहे. अजित पवार यांचा शरद पवार यांना फोन राष्ट्रवादी काँग्रेस पक्षामध्ये दोन गट पडल्यानंतर लोकसभा निवडणुकीत शरद पवार गटाला चांगले यश मिळाले होते. तर विधानसभा निवडणुकीत अजित पवार गटाला भरघोस यश मिळाले आहे. या पार्श्वभूमीवर आता हे दोन्ही गट एकत्र येणार असल्याची चर्चा सुरू झाली आहे. यादरम्यान अजित पवार आणि शरद पवार यांच्या भेटीगाठी देखील वाढल्या आहेत. त्यामुळे याबाबत राजकीय वर्तुळात चांगलीच चर्चा रंगली आहे. आता पुन्हा एकदा शरद पवार यांची प्रकृती खराब झाल्यानंतर अजित पवार यांनी त्यांना फोन केल्याची माहिती समोर आली आहे. त्यामुळे हे काका-पुतणे लवकरच एकत्र येतील का? याबाबत तर तर्क वितर्क लावले जात आहेत.