वाईन शॉपचे शटर तोडून 67 हजारांचा ऐवज लंपास:चोरटे सीसीटीव्हीमध्ये कैद, पोलिसांचा तपास सुरु

येथील नेभनानी कॉम्प्लेक्समधील महाजन वाईन शॉपचे शटर तोडून चोरट्यांनी २८ नोव्हेंबरच्या पहाटे ४ वाजोच्या सुमारास दुकानातील ६७ हजार ५०० रुपयांचा ऐवज लंपास केला असून, चोरट्यांचे कृत्य सीसीटीव्ही कॅमेऱ्यात कैद झाले आहे. याबाबत प्राप्त माहितीनुसार, येथील शहरातून राष्ट्रीय महामार्गाकडे जाणाऱ्या रस्त्यावर सिव्हिल लाईनसमोर असलेल्या नेभनानी कॉम्प्लेक्समध्ये तळघरात महाजन वाईन शॉप हे दारू विक्रीचे दुकान आहे. अज्ञात चोरट्यांनी २८ नोव्हेंबरच्या पहाटे ४ वाजेच्या सुमारास वाईन शॉपकडे आपला मोर्चा वळवला. अतिशय शांतपणाने त्यांनी वाईन शॉपचे शटर वाकून वाकवून दुकानात प्रवेश केला. दुकानातील गल्ल्यांचे कुलूप तोडून गल्ल्यातील ४० हजार रुपये रोकड तसेच २७ हजार ५०० रुपयांची दारू असा ऐवज लंपास केला. अज्ञात चोरट्यांना लवकरच गजाआड करण्यात येईल, असे पोलिस विभागाद्वारे सांगण्यात येत आहे. सध्याला ग्रामीण भागात चोऱ्यांचे प्रमाम मोठ्याप्रमाणात वाढले असून पोलिसांना नजर करडी ठेऊन चोरट्यांचा बंदोबस्त करावा लागणार आहे. घटना सकाळी उघडकीस आल्यानंतर पोलिसांना याची माहिती देण्यात आली. घटनास्थळी शहर पोलिस स्टेशनचे ठाणेदार जाधव तसेच पोलिस उपनिरीक्षक शिंदे यांनी आपल्या ताफ्यासह भेट देऊन पाहणी केली. या प्रकरणी अमन रवींद्र महाजन यांच्या फिर्यादीवरून अज्ञात चोरट्यांविरुद्ध शहर पोलीस स्टेशनला गुन्हा दाखल करण्यात आला असून, तपास जाधव यांच्या मार्गदर्शनाखाली पोलिस उपनिरीक्षक शिंदे करत आहेत.