विधानसभा निवडणुकीसाठी जिल्हा प्रशासन सज्ज

विधानसभेसाठी बुधवारी मतदान होणार आहे. प्रत्येक मतदान केंद्रावर सर्व सुविदा उपलब्ध करुन देण्यात येणार आहेत. पुरुष आणि महिलांसाठी स्वतंत्र रांगा, गर्दी झाल्यास बसण्यासाठी बाकडे, खुर्च्या, प्रतिक्षालय, पिण्याचे पाणी, स्वच्छातागृह, वैद्यकिय सुविधा, वयोवृध्द नागरिक आणि दिव्यांगासाठी व्हीलचेअर आदी विशेष सुविधा देण्यात येणार असल्याचे जिल्हाधिकारी सालीमठ यांनी सांगितले. यावेळी जिल्हा पोलिस अधीक्षक राकेश ओला, उपजिल्हा निवडणूक अधिकारी राहूल पाटील, नायब तहसीलदार प्रशांत गोसावी आदी उपस्थित होते.

जिल्हा आचारसंहिता कक्षाकडे 33 तक्रारी दाखल झालेल्या आहेत. यामध्ये खासगी संस्थांच्या कर्मचार्‍यांचा प्रचारात सहभागाबाबत 6, धार्मिक स्थळाचा वापर, भाषणातील वक्तव्याबाबत 6, पोलिस निरीक्षक कारवाई करत नसल्याबाबत 4 परवानगी न घेता वाहनांवर उमेदवारांचा फोटो अशा तीन तक्रारींचा समावेश आहे. यापैकी सात तक्रारीत मात्र तथ्या आढळून आल्यामुळे गुन्हा दाखल झालेला आहे 23 तक्रारींमध्ये तथ्थ आढळून आले नाही. तीन तक्रारींबाबत चौकशी सुरु असल्याने प्रलंबित आहेत.

3765 बूथवर जिल्हा पोलिस दलाने तगडा बंदोबस्त नेमला आहे. सतीची वाडी (संगमनेर), तरकसवाडी (शिर्डी) हे बूथ संवेदनशील आहेत. पोलिस अधीक्षक, दोन अपर पोलिस अधीक्षक, 10 उपअधीक्षक, 36 पोलिस निरीक्षक, 173 सहायक निरीक्षक/ उपनिरीक्षक, 3623 पोलिस कॉन्स्टेबल, 3623 होमगार्ड, केंद्रीय राखीव पोलिस दलाच्या 11 तुकड्या, राज्य राखीव पोलिस दलाच्या 5 तुकड्या तैनात केल्या आहेत.

आचारसंहिता कालावधीत विविध यंत्रणाकडून जिल्हाभरात 31 कोटी 19 लाख 26 हजार रुपये किंमतीचे वस्तू जप्त करण्यात आलेल्या आहेत. यामध्ये पारनेर येथे पकडण्यात आलेल्या 23 कोटी 61 लाखांची मौल्यवान वस्तू, 3 कोटी 64 हजार रुपयांचे मद्य, 53 लाख रुपये किमतीचे अमली पदार्थ, 2 कोटी 11 लाखांच्या भेटवस्तू तसेच 1 कोटी 28 लाख 89 रुपयांच्या रोख रकमेचा समावेश आहे.