विराट कोहलीच्या बॅगमध्ये कुर्‍हाड, तलवारी अन् ढाल? (Video)

पर्थ : पर्थ कसोटीत तडफदार शतक झळकावत पुनरागमनाचा डंका वाजवणार्‍या विराट कोहलीचे फॉर्ममध्ये परतणे चाहत्यांसाठी अर्थातच सुखावणारे ठरले आहे. आता अ‍ॅडलेडमध्ये विराट आणखी तडफेने यजमान गोलंदाजांवर तुटून पडेल, अशी अपेक्षा साहजिकच आहे. यादरम्यान, विराटचा एक वेगळाच व्हिडीओ व्हायरल होत असून यात तो त्याच्या बॅगमधून चक्क कुर्‍हाड, तलवार काढत असल्याचे दिसून आले आहे.

या व्हिडीओमध्ये त्याला विचारण्यात आले की, तुझ्या बॅगमध्ये काय आहे? प्रत्युत्तरात विराट बॅग उघडत त्याच्यातून कुर्‍हाड काढतो, यानंतर बेसबॉलची बॅट काढतो आणि त्यानंतर शेवटी दोन तलवार बाहेर काढतो. मग व्हिडीओ अचानक बंद पडतो.

विराट कोहलीचा हा प्रमोशनल व्हिडीओ असून एखाद्या जाहिरातीचा व्हिडीओ असल्याचे म्हटले जात आहे, पण चाहत्यांनी मात्र या व्हिडीओेचे कनेक्शन सध्या सुरू असलेल्या बॉर्डर-गावसकर ट्रॉफीशी जोडले आहे. साहजिकच हा एखाद्या जाहिरातीशी संबंधित व्हिडीओ असू शकतो; परंतु चाहते त्याला अ‍ॅडलेड कसोटीची तयारी असल्याचे म्हणत आहेत.