विरुद्ध दिशेने येणाऱ्या दुचाकीस्वाराला बेदम मारहाण:कारचालकाविरोधात गुन्हा दाखल

विरुद्ध दिशेने येणाऱ्या कारचालकाने दुचाकीस्वाराला गजाने बेदम मारहाण केल्याची घटना गणेश पेठेत मध्यरात्री घडली. याप्रकरणी मोटारचालकासह साथीदारांविरुद्ध खडक पोलिसांनी गुन्हा दाखल केला. रणजित किशोर शिंदे (वय २८, रा. गंज पेठ) असे जखमी झालेल्या दुचाकीस्वाराचे नाव आहे. याप्रकरणी कारचालकासह त्याच्याबरोबर असलेल्या साथीदारांविरुद्ध गुन्हा दाखल करण्यात आला आहे. शिंदे यांनी खडक पोलीस ठाण्यात फिर्याद दिली आहे. पोलिसांनी दिलेल्या माहितीनुसार, शिंदे आणि त्यांची पत्नी रुग्णालयात गेले होते. शुक्रवारी मध्यरात्री साडेबाराच्या सुमारास शिंदे दाम्पत्य दुचाकीवरून गणेश पेठेतून निघाले होते. त्यावेळी मोटारचालक विरुद्ध दिशेने आला. शिंदे दाम्पत्याने मोटारचालकाला तो विरुद्ध दिशेने माेटार चालवित असल्याचे सांगितले. कारचालक आणि साथीदारांनी शिंदे दाम्पत्याला शिवीगाळ केली. दुचाकीस्वार रणजित यांना शिवीगाळ करून कारचालक आणि त्याच्याबरोबर असलेल्या साथीदारांनी बेदम मारहाण केली. त्यांच्या डोक्यात कठीण वस्तू मारली. मारहाणीत शिंदे यांच्या डोक्याला गंभीर दुखापत झाली. पोलीस हवालदार एस पारखे तपास करत आहेत. चाेरट्यांची भरदिवसा घरफोडी, दोन लाखांचा मुद्देमाल चोरीस कात्रज भागात भरदिवसा एका घराचे कुलूप तोडून अज्ञात चोरट्यांनी कपाटातील दागिने आणि रोकड असा दोन लाख १२ हजार रुपयांचा ऐवज चोरून नेल्याची घटना घडली अाहे.याबाबत अभिजित विठ्ठल झाडे (वय २६, रा. वाघजाईमाता अपार्टमेंट, वाघजाईनगर, कात्रज) यांनी भारती विद्यापीठ पोलीस ठाण्यात फिर्याद दिली आहे. झाडे कुटुंबीय कामानिमित्त बाहेर गेले होते. चोरट्यांनी सदनिकेचे कुलूप तोडले. शयनगृहातील कपाट उचकटून चोरट्यांनी रोकड आणि सोन्याचे दागिने असा ऐवज चोरून नेला. पोलीस उपनिरीक्षक निलेश मोकाशी तपास करत आहेत.