शिराळ्यात भाजपचे सत्यजित देशमुख यांचा विजय, मानसिंगराव नाईक यांना धक्का

शिराळा; पुढारी वृत्तसेवा : शिराळा मतदारसंघात (Shirala Assembly Election results) राष्ट्रवादी शरदचंद्र पवार पक्षाचे उमेदवार आमदार मानसिंगराव नाईक विरुद्ध भाजपचे उमेदवार जिल्हा परिषदेचे माजी उपाध्यक्ष सत्यजित देशमुख अशी दुरंगी लढत झाली. या लढतीत मानसिंगराव नाईक यांचा दारूण पराभव झाला. येथे सत्यजित देशमुख मोठ्या मताधिक्याने विजयी झालेत.

शिराळा विधानसभा मतदारसंघात झालेल्या चुरशीच्या लढतीत महायुतीचे भाजपचे उमेदवार सत्यजित देशमुख यांनी राष्ट्रवादी काँग्रेस शरदचंद्र पवार पक्षाचे विद्यमान आमदार मानसिंगराव नाईक यांचा २२ हजार ६८९ मतांनी पराभव केला. भाजप नेते सम्राट महाडिक हे प्रमुख विजयाचे शिल्पकार ठरले. वाळवा तालुक्यातील ४८ गावांतही भाजपला चांगली आघाडी मिळाली.

सकाळी आठ वाजता मतमोजणी गोरक्षनाथ आयटीआय येथे सुरू झाली. सुरुवातीपासून राजेंद्रसिंह नाईक, युवा नेते विराज नाईक मतमोजणीच्या ठिकाणी उपस्थित होते. पहिल्या आणि दुसऱ्या फेरीत आमदार मानसिंगराव नाईक यांनी आघाडी घेतली होती. तर तिसऱ्या फेरीपासून अखेरपर्यंत सत्यजित देशमुख यांनी आघाडी घेतली होती. त्यामुळे त्यांचे कार्यकर्त्यांनी गावागावात गुलालाची उधळण, फटाके उडवून आनंद साजरा केला.

ज्यावेळी मताधिक्यात वाढ होत होती; त्यावेळी उमेदवार सत्यजित देशमुख आणि सम्राट महाडिक हे मतमोजणीच्या ठिकाणी दाखल झाले. विजयाची खात्री झाल्याने कार्यकर्त्यांनी मोठ्या प्रमाणात जल्लोष केला. यावेळी राहुल महाडिक, केदार नलवडे, हणमंतराव पाटील, पृथ्वीसिंह नाईक, विश्वप्रतापसिंह नाईक , सागर खोत, दि. बा. पाटील, चंद्रकांत पाटील आदींनी अभिनंदन केले. विजयानंतर शिराळा मतमोजणी ठिकाणाहून भव्य रॅली काढण्यात आली.

माझी झालेली बंडखोरी, त्यातून आलेली नाराजी, परत घेतलेला माघारी अर्ज हे फक्त पक्षश्रेष्ठीच्या आदेशाने केले आहे. आमचे नेते देवेंद्र फडणवीस यांच्यासोबत आम्ही कायम एकनिष्ठ राहू. सत्यजित देशमुख यांच्या विजयात वाळवा तालुक्यातील ४८ गावांचा मोठा वाटा आहे. शिराळा आणि वाळवा तालुक्यातील कार्यकर्त्यांनी अगदी शिलेदारासारखे काम केले. आम्हीं केलेल्या कष्टाचे चीज झाले, असे सम्राट महाडिक म्हणाले.

खुंदलापूर या चांदोली अभयारण्य लगतच्या गावात मानसिंगराव नाईक यांना एकही मत मिळाले नाही. तर या गावात सत्यजित देशमुख यांना २२८ मते मिळाली.