सत्ता आल्यानंतर 12 तासांत मुख्यमंत्री पदाचा चेहरा घोषित करू:विजय वडेट्टीवारांचे वक्तव्य, म्हणाले - जो जबाबदारी पेलेल तो कुटुंबप्रमुख

सत्ता आल्यानंतर 12 तासांत मुख्यमंत्री पदाचा चेहरा घोषित करू, असे वक्तव्य विजय वडेट्टीवार यांनी केले आहे. तसेच मी सत्तेतला आमदार असणार, असा विश्वासही वडेट्टीवार यांनी व्यक्त केला आहे. परवा सत्तास्थापनेचा मंडप तयार दिसेल, असा दावा देखील विजय वडेट्टीवार यांनी व्यक्त केला. काँग्रेस नेते विजय वडेट्टीवार यांनी शुक्रवारी सायंकाळी नागपूर येथे माध्यमांशी संवाद साधला. यावेळी बोलताना त्यांनी मुख्यमंत्री पदासह विविध विषयांवर भाष्य केले. सत्ता आल्यानंतर 12 तासांत मुख्यमंत्री पदाचा चेहरा घोषित करू, असे ते म्हणाले. तसेच जे बंडखोर आहेत, ते आमचेच आहेत. पक्षश्रेष्ठींनी त्यांच्याशी चर्चा करतील, असे त्यांनी सांगितले. काय म्हणाले विजय वडेट्टीवार? अपक्ष उमेदवार आणि बंडखोरांशी संपर्क करण्याबाबत बोलताना विजय वडेट्टीवार म्हणाले की, महाराष्ट्रात जेवढी काँग्रेस विचारसरणीची मंडळी आहेत, ती आमचीच आहेत. जे काही बंडखोर आहेत, ते आमचे आहेत. आपल्यावर अन्याय झाला असल्याची त्यांची भावना आहे. मात्र ते आमचेच आहेत. पक्षश्रेष्ठींनी बंडखोरांशी चर्चा करण्यास सुरुवात केली असावी, असे विजय वडेट्टीवार म्हणाले. मुख्यमंत्रीपदाबाबत तिन्ही पक्षांचा निर्णय अंतिम मुख्यमंत्रीपदाबाबत बोलताना वडेट्टीवार म्हणाले, काँग्रेसला मुख्यमंत्रीपद भेटावे ही काँग्रेसजनांची इच्छा आहे, तसेच इतर पक्षांच्या कार्यकर्त्यांची देखील आपल्या पक्षाला मुख्यमंत्रीपद भेटावे अशी इच्छा आहे. पण तीनही पक्ष एकत्र येऊन जो निर्णय होईल, तो अंतिम असेल, असेही विजय वडेट्टीवार यांनी सांगितले. जबाबदारी पेलणारा कुटुंबप्रमुख होईल कुटुंबप्रमुख मुख्यमंत्री असे उद्धव ठाकरे यांचे म्हणणे आहे, त्यांच्या या विधानवर विजय वडेट्टीवार म्हणाले, कुटुंबप्रमुख एकच असतो. तीन घरे असतात, तेव्हा तिघांनी मिळून कुटुंबप्रमुख ठरवायचा असतो. तो आम्ही ठरवू. जो जबाबदारी पेलेल, तो कुटुंबप्रमुख होईल, असेही वडेट्टीवार यांनी सांगितले. हे ही वाचा... मुख्यमंत्रीपदावरून कोणताही वाद नाही:मविआला बहुमत मिळेल, त्यानंतर CM पदावर चर्चा करून निर्णय घेणार - चेन्नीथला विधानसभा निवडणुकीत महाराष्ट्रातील जनतेचा कौल महाविकास आघाडीलाच मिळेल व स्पष्ट बहुमतासह काँग्रेस महाविकास आघाडी सरकार स्थापन करेल, असा विश्वास काँग्रेसचे महाराष्ट्र प्रभारी रमेश चेन्नीथला यांनी व्यक्त केला आहे. सविस्तर वाचा... नाना पटोलेंचे मुख्य निवडणूक अधिकाऱ्यांना पत्र:फॉर्म 17 सी भाग दोन, फेरीनिहाय तक्त्यासह अंतिम निकालाच्या प्रतीची केली मागणी काँग्रेस प्रदेशाध्यक्ष नाना पटोले उद्या जाहीर होणाऱ्या निकालाच्या पार्श्वभूमीवर मतमोजणीत कोणतीही गडबड होऊ नये यासाठी योग्य ती खबरदारी घेत आहेत. यासंबंधी त्यांनी थेट राज्याच्या मुख्य निवडणूक अधिकाऱ्यांना पत्र लिहून फॉर्म 17 सी भाग 2 सह इतर काही दस्तावेजांची मागणी केली आहे. सविस्तर वाचा...