सरहद स्कूलमध्ये आजी-आजोबांचा स्नेहमेळावा:पारंपरिक वेशभूषा, पाककला स्पर्धा आणि सांस्कृतिक कार्यक्रमांचा आनंद

धनकवडीतील सरहद पब्लिक स्कूल आणि ज्युनिअर कॉलेजमध्ये 98व्या अखिल भारतीय मराठी साहित्य संमेलनाच्या निमित्ताने आजी-आजोबांचा स्नेहमेळावा उत्साहात साजरा करण्यात आला. कार्यक्रमाला ज्येष्ठ पत्रकार अविनाश गोडबोले, सुरेश मेहता, सरोज मेहता आणि मनोहर कोलते यांची प्रमुख उपस्थिती होती. कार्यक्रमाची सुरुवात दीप प्रज्वलन आणि सरस्वती पूजनाने झाली, त्यानंतर शिक्षकांनी संमेलन गीत सादर केले. आजी-आजोबांसाठी विविध स्पर्धांचे आयोजन करण्यात आले होते, ज्यामध्ये पारंपरिक वेशभूषा स्पर्धा, पाककला स्पर्धा, चित्रकला स्पर्धा, उखाणे स्पर्धा, संगीत खुर्ची, काव्यवाचन आणि कथाकथन यांचा समावेश होता. विशेष आकर्षण म्हणजे आजी-आजोबांनी पारंपरिक वेशभूषेत रेड कार्पेटवर केलेला कॅटवॉक होता. पाककला स्पर्धेत विदर्भ, खान्देश, पश्चिम महाराष्ट्र, कोंकण आणि मराठवाड्यातील पारंपरिक खाद्यपदार्थांचे प्रदर्शन करण्यात आले. विद्यार्थ्यांनी मराठी गीतांवर नृत्य सादर करून कार्यक्रमाची रंगत वाढवली. कार्यक्रमात आजी-आजोबांनी 'वृक्षवल्ली आम्हा सोयरे', 'प्लॅस्टीकचा वापर करू नका', 'घरचा ओला कचरा घरातच जीरवा' असे महत्त्वपूर्ण संदेश दिले आणि मुलांना मोबाईलपेक्षा आधी रामकृष्णहरी शिकण्याची गरज व्यक्त केली. ज्येष्ठ पत्रकार अविनाश गोडबोले यांनी शिक्षणाच्या बाजारीकरणाच्या काळात सरहद संस्थेचे शैक्षणिक व सामाजिक कार्य कौतुकास्पद असल्याचे सांगितले. मनोहर कोलते यांनी एकत्र कुटुंब पद्धतीचे महत्त्व अधोरेखित करत आजी-आजोबांकडून मिळणारे संस्कार आणि प्रेमाचे बाळकडू पुढील पिढीसाठी महत्त्वाचे असल्याचे सांगितले.