చేసేది చిన్న జాబే.. కానీ, విమానంలో ఆఫీస్‌కు వెళ్తుంది! పైగా చాలా తక్కువ ఖర్చుతో..

సాధారణంగా ఉద్యోగం చేసే వారు బైకులు, ఆటోలు, రైళ్లు, బస్సుల్లోనో ప్రయాణాలు చేస్తుంటారు. కొంతమంది సాఫ్ట్‌వేర్‌ వాళ్లు లేదా ఇతర రంగాల్లో మంచి స్థాయిలో ఉన్నవాళ్లు మాత్రం కార్లలో వారివారి ఆఫీస్‌లకు వెళ్తుంటారు. కానీ ఈ మహిళ మాత్రం ఏకంగా విమానంలో ఆఫీసుకు వెళ్లి వస్తోంది. అది కూడా చాలా తక్కువ ఖర్చులో. విమానంలో రాకపోకలు సాగించకంటే ముందు అయ్యే ఖర్చు కంటే.. ఇప్పుడు చాలా తక్కువ అవుతుందని ఆమె ఎంతో సంతోషంగా చెబుతోంది. విమానంలో ఆఫీస్‌కి వెళ్తోంది అంటే చాలా పెద్ద ఉద్యోగమే అని అనుకుంటున్నారా? అయితే మీరు పప్పులో కాలేసినట్లే. ఆమె చేసేది చిన్న ఉద్యోగమే. కానీ, తన కుటుంబం కోసం ఆమె విమానంలో రాకపోకలు సాగిస్తోంది. అసలింతకీ ఆమె విమానంలో ఆఫీస్‌కి ఎందుకు వెళ్తోంది? ఆమె ఏం ఉద్యోగం చేస్తోంది? అనే వివరాలు చూస్తే ఇలా ఉన్నాయి. భారత సంతతికి చెందిన రాచెల్ కౌర్.. ప్రస్తుతం మలేషియాలోని పెనాంగ్ రాష్ట్రంలో నివాసం ఉంటుంది. ఈమెకు ఇద్దరు పిల్లలు కూడా ఉన్నారు.

మలేషియా రాజధాని నగరమైన కౌలాంలపూర్‌లోని ఎయిర్ ఏషియా ఫైనాన్స్ ఆపరేషన్స్‌లో అసిస్టెంట్ మేనేజర్‌గా పని చేస్తోంది. మొదట్లో కౌలాలంపూర్‌లోనే ఓ గది అద్దెకు తీసుకుని ఒంటరిగా ఉండేది. వారంలో ఐదు రోజులు పని చేశాకా.. వీకెండ్స్‌లో పెనాంగ్ వెళ్లేది. తన కుటుంబం, పిల్లలు అక్కడే ఉంటారు. అయితే.. జాబ్‌ కోసం రాజధాని నగరంలో నివాసం వల్ల ఖర్చులు కూడా చాలా ఎక్కువ అయ్యాయి. ముఖ్యంగా అద్దె, వారం వారం ఇంటికి వెళ్లి రావడం కోసం రాచెల్‌కు నెలకు 474 డాలర్లు మన కరెన్సీలో రూ.41 వేలు అయ్యేవి. ఖర్చు ఎక్కువవడమే కాకుండా.. రోజూ తన కుటుంబాన్ని చాలా మిస్ అవుతున్న రాచెల్‌కు అది ఏమాత్రం నచ్చలేదు. దీంతో దీనికి ఏదో ఒక పరిష్కారం వెతకాలనుకుంది. పూర్తి కుటుంబాన్ని ఇక్కడికే తీసుకు వచ్చి ఉంచితే మరింత ఖర్చు అవుతుందని భావించిన ఆమె.. పిల్లల వద్దే ఉంటూ రోజూ ఆఫీసుకు వచ్చి వెళ్లాలని నిర్ణయించుకుంది. అయితే బస్సులు, రైళ్లలో రావడం వల్ల చాలా సమయం వృథా అవుతుంది కాబట్టి.. విమానంలో ప్రయాణిస్తే బాగుంటుందని భావించింది.

ఈక్రమంలోనే విమానానికి రోజూ వచ్చి పోవడానికి ఎంత ఖర్చు అవుతుందో లెక్కలు వేసింది. ముఖ్యంగా ఇలా నెలకు కేవలం 316 డాలర్లు మన కరెన్సీలో రూ.27 వేలు మాత్రమే ఖర్చు అవుతున్నట్లు గుర్తించిన తెగ సంబుర పడిపోయింది. 2024లో ఈ నిర్ణయం తీసుకున్న రాచెల్.. కౌలాలంపూర్‌లో అద్దె ఇంటిని ఖాళీ చేసి పెనాంగ్‌కు వెళ్లిపోయింది. అక్కడే తన పిల్లలతో ఉంటూ రోజూ విమానం ద్వారా ఆఫీసుకు వెళ్లి వస్తోంది. అయితే.. పేరుకు విమానంలో ప్రయాణిస్తున్నా.. ఖర్చులు తగ్గడం ఇక్కడ విశేషం. పైగా ఆమె తన పిల్లలతో రోజు కలిసి ఉంటూ.. వారి బాగోలు చూసుకుంటూ ఉంటుంది. కాకపోతే ఉదయం 4 గంటలకే నిద్రే లేవాల్సి వస్తుందని.. 5 గంటలకల్లా రెడీ అయి 6.30 గంటలకు విమానం అందుకోవాలని చెబుతుంది. అయితే ఇలా ప్రతి రోజూ 700 కిలో మీటర్ల ప్రయాణిస్తున్నట్లు పేర్కొంది. దీని వల్ల కాస్త శారీరక శ్రమ ఎక్కువ అవుతుందని.. కాకపోతే పిల్లల కోసం ఈమాత్రం చేయడం తనకేమీ కష్టంగా లేదని వెల్లడించింది. తన ఇంటికి ఆఫీస్‌కి 700 కిలోమీటర్ల దూరం ఉన్నప్పటికీ.. విమానంలో ప్రయాణం చేయడంతో తక్కువ టైమ్‌లోనే ఆఫీస్‌కు చేరుకుంటోంది.