Hyundai IPO Listing : સ્ટોક માર્કેટમાં આ ભાવે લિસ્ટ થઈ શકે છે શેર, જાણો અનુમાન

મુંબઇ : દક્ષિણ કોરિયાની અગ્રણી ઓટોમોબાઈલ કંપની હ્યુન્ડાઈના(Hyundai IPO Listing)ભારતીય યુનિટ હ્યુન્ડાઈ મોટર ઈન્ડિયાનો આઈપીઓ હવે તેના અંતિમ તબક્કામાં પહોંચી ગયો છે. હ્યુન્ડાઈ મોટર ઈન્ડિયાના શેર 22 ઓક્ટોબર મંગળવારના રોજ ભારતીય સ્ટોક એક્સચેન્જમાં લિસ્ટ થશે. કંપનીનો IPO 15 ઓક્ટોબરે ખુલ્યો હતો અને 17 ઓક્ટોબરે બંધ થયો હતો. શરૂઆતના બે દિવસ સુધી આ IPOમાં પૈસાનું રોકાણ કરવા માટે કોઈ જોવા મળ્યું ન હતું. પરંતુ છેલ્લા દિવસે હ્યુન્ડાઈ મોટર ઈન્ડિયાનો IPO સંપૂર્ણ સબસ્ક્રાઈબ થયો હતો પરંતુ દિવસના અંત સુધીમાં તેનું સબસ્ક્રિપ્શન 2.37 ગણું વધી ગયું હતું.

આજે ગ્રે માર્કેટમાં GMP કિંમત કેટલી છે?

રોકાણકારોના ખૂબ જ નબળા પ્રતિસાદને કારણે, ગ્રે માર્કેટમાં પણ હ્યુન્ડાઈ મોટર ઈન્ડિયાના શેર ખરીદવા માટે કોઈ તૈયાર નહોતું. ગયા અઠવાડિયે શુક્રવારે હ્યુન્ડાઈ મોટર ઈન્ડિયાની જીએમપી કિંમત પ્રથમ વખત નેગેટિવ પહોંચી ગઈ હતી. શુક્રવારે 18 ઓક્ટોબરે ગ્રે માર્કેટમાં કંપનીનો શેર ઘટીને રૂપિયા 32 થયો હતો. જોકે, હવે તેમાં ઘણો સુધારો થયો છે અને સોમવારે 21 ઓક્ટોબરે કંપનીના શેરની જીએમપી કિંમત રૂપિયા 95 પર પહોંચી ગઈ છે.

હ્યુન્ડાઈ મોટર ઈન્ડિયાએ તેના IPO હેઠળ દરેક શેર માટે 1865 રૂપિયાથી 1960 રૂપિયાની કિંમતની રેન્જ નક્કી કરી હતી. ભારતના ઈતિહાસમાં આ સૌથી મોટો આઈપીઓ છે. જેના હેઠળ કંપની રૂપિયા 27,870.16 કરોડ એકત્ર કરી રહી છે.

કંપનીના શેર કયા ભાવે લિસ્ટ થઈ શકે છે?

આજની જીએમપી કિંમતના આધારે હ્યુન્ડાઈ મોટર ઈન્ડિયાના શેર રૂપિયા 2055માં લિસ્ટ થઈ શકે છે. આ રૂપિયા 2055માં કંપની દ્વારા રૂપિયા 1960 અને જીએમપી રૂપિયા 95 પર નિર્ધારિત શેરની ઉપલી કિંમત શ્રેણીનો સમાવેશ થાય છે. આ માત્ર અનુમાન છે. લિસ્ટિંગ સમયે કંપનીના શેરની કિંમત 2055 રૂપિયાની ઉપર અથવા નીચે હોઈ શકે છે.

(નોંધ: આ માહિતીના આધારે શેરબજારમાં રોકાણ કરવું નહિ. કોઈપણ શેરમાં રોકાણ કરતા પહેલા તમારા નાણાકીય સલાહકારની સલાહ લેવી હિતાવહ છે. કોઈ પણ રોકાણ અંગે ‘મુંબઈ સમાચાર’ જવાબદાર રહેશે નહીં.)