مقامی کاریگروں کو عالمی منڈی سے جوڑنا حکومتِ جموں و کشمیر کی اولین ترجیح: لیفٹیننٹ گورنر

سرینگر// جموں و کشمیر کے لیفٹیننٹ گورنر منوج سنہا نے کہا ہے کہ گزشتہ چند برسوں میں ان کی انتظامیہ نے اس بات کو یقینی بنایا ہے کہ جموں و کشمیر کے کاریگروں کو عالمی سطح پر متعارف کرایا جائے تاکہ ان کی بہترین دستکاری کو فروغ ملے۔
انہوں نے سرینگر کو “ورلڈ کرافٹ سٹی” میں شامل کرنے کو ایک بڑی کامیابی قرار دیا۔ ایس کے آئی سی سی میں منعقدہ 60ویں ورلڈ کرافٹ کونسل (ڈبلیو سی سی) کے اجلاس سے خطاب کرتے ہوئے، گورنر سنہا نے سرینگر کو ایک سمارٹ سٹی میں تبدیل کرنے کے لیے کیے گئے مختلف اقدامات پر روشنی ڈالی۔
انہوں نے کہا کہ شہر میں وسیع پیمانے پر بنیادی ڈھانچے کی ترقی اور اسمارٹ حل کے تعارف سے نہ صرف شہریوں کے معیارِ زندگی میں بہتری آئی ہے بلکہ اس کی عالمی اہمیت میں بھی اضافہ ہوا ہے۔
لیفٹیننٹ گورنر نے کہا، “سرینگر نے پچھلے 50 ماہ میں تیزی سے ترقی کرتے ہوئے امید اور مواقع کا مرکز بننے کی طرف قدم بڑھایا ہے، جو نئے خوابوں اور امکانات کے لیے ایک پلیٹ فارم فراہم کر رہا ہے”۔
انہوں نے ڈبلیو سی سی کی 60ویں سالگرہ کے موقع پر عالمی مہمانوں کا پرتپاک استقبال کیا اور دستکاری کے شعبے کو درپیش چیلنجز پر قابو پانے کے لیے اس اجتماع کی اہمیت پر زور دیا۔
لیفٹیننٹ گورنر نے کہا، “یہ اجلاس کاریگروں، صنعت کے ماہرین اور سرکاری عہدیداروں کو تعاون، علم کے تبادلے اور جدید حل تلاش کرنے کا منفرد موقع فراہم کرتا ہے”۔
انہوں نے کہا کہ حکومت جموں و کشمیر کی صدیوں پرانی دستکاری کو دوبارہ زندہ کرنے اور انہیں عالمی منڈیوں سے جوڑنے کے لیے حکمت عملی پر کام کر رہی ہے۔ انہوں نے کہا کہ حکومت کا مقصد ان دستکاریوں کے تحفظ کے ساتھ ساتھ ان کی برآمدات کو بڑھانا ہے تاکہ عالمی سطح پر ان کی شناخت کو مزید تقویت دی جا سکے۔
لیفٹیننٹ گورنر نے کاریگروں اور بُنکرز کے لیے شروع کیے گئے مختلف سرکاری پروگراموں کی تفصیلات بھی بتائیں، جن میں مالیاتی اسکیمیں اور جدید مارکیٹوں میں مقابلے کے لیے درکار تربیت کے اقدامات شامل ہیں۔
انہوں نے کہا کہ جموں و کشمیر کی برآمدی درجہ بندی میں نمایاں بہتری آئی ہے، جو 2023-2024 میں 25ویں مقام سے بڑھ کر 17ویں مقام پر آ گئی ہے۔
سنہا نے جموں و کشمیر میں قائم کی گئی 5000 سے زائد کوآپریٹو سوسائٹیوں کے کردار کو بھی سراہا جو مقامی کاریگروں کو اہم تعاون فراہم کر رہی ہیں۔
انہوں نے کہا کہ جموں و کشمیر کی معروف مصنوعات کی جی آئی ٹیگنگ نے ان کی شناخت کو محفوظ رکھنے اور ثقافتی ورثے کے تحفظ میں اہم کردار ادا کیا ہے۔
لیفٹیننٹ گورنر نے کہا کہ عالمی سطح پر جموں و کشمیر کی پشمینہ اون اور کشمیری قالینوں کی پہچان ایک قابل فخر حقیقت ہے اور یہ دنیا کی بہترین مصنوعات میں شمار ہوتی ہیں۔