औंढा नागनाथ पंचायत समिती रेकॉर्ड जळीत प्रकरणात अज्ञाताचा शोध लागेना:जि.प.सह पोलिसांच्या कार्यपद्धतीवर संशय, तर 2017-18 वर्षाची तपासणी करण्याची गरज

औंढा नागनाथ पंचायत समितीच्या रेकॉर्ड जळीत प्रकरणात अज्ञात व्यक्तीचा अद्यापही शोध लागला नाही. त्यामुळे औंढा नागनाथ पोलिसांसह जिल्हा परिषदेच्या लेखा विभागाच्या कार्यपध्दतीवर संशय व्यक्त केला जात आहे. लेखा विभागाने सन 2017-18 पासून दोनवर्षाच्या कपातीची चौकशी करण्याची गरज असल्याचे मत व्यक्त केले जात आहे. औढा नागनाथ पंचायत समिती अंतर्गत कंत्राटदारांच्या शासकिय कर कपातीच्या रकमांच्या संशयावरून जिल्हा परिषदेच्या लेखा विभागाने चौकशी सुरु केली होती., त्यासाठी स्थापन केलेल्या पथकाने औंढा नागनाथ येथे भेट देऊन सन 2019-20 पासून ते पुढील तीन वर्षाचे कॅशबुक व इतर कागदपत्रे काढून ठेवली होती. मात्र पथक हिंगोलीत परतल्यानंतर या रेकॉर्डलाच आग लागली. यामध्ये कॅशबुक व इतर साहित्य जळून खाक झाले. या प्रकरणात औंढा नागनाथ पोलिस ठाण्यात अज्ञात व्यक्ती विरुध्द गुन्हा दाखल झाला. दरम्यान, या प्रकरणात विज कंपनीने शॉर्ट सर्किटमुळे आग लागलीच नसल्याचा स्पष्ट अहवाल दिला. त्यामुळे लागलेली आग मानवनिर्मित असल्याचे स्पष्ट होत आहे. मात्र असे असतांना घटना घडून सुमारे 15 दिवसांपेक्षा अधिक कालावधी झाल्यानंतरही अद्यापही पोलिसांना अज्ञात व्यक्तीचा शोध लागला नाही. तर दुसरीकडे या प्रकरणात लेखा विभागाने कारवाई करणे अपेक्षीत असतांना लेखा विभागानेही गटविकास अधिकाऱ्यांकडून कारवाई केली जात असल्याचे सांगत हातवर केले आहे. त्यामुळे पोलिस प्रशासन व जिल्हा परिषदेच्या कार्यपध्दतीवरच शंका व्यक्त होऊ लागली आहे. या शिवाय लेखा विभागाने इतर कागदपत्रांची पंचायत समितीकडे मागणी केली असता त्यापैकी अनेक कागदपत्रे पंचायत समितीने दिलीच नाहीत. त्यानंतरही लेखा विभागा मुग गिळून गप्प आहे. त्यामुळे आता दुसरे कागदपत्रे जळण्याची वाट पाहिली जात आहे काय अशी शंका बोलून दाखविली जात आहे. तर सन 2017-18 या वर्षाची चौकशी करा औंंढा नागनाथ पंचायत समितीला कॅशबुक मिळत नसेल तर सन 2017-18 व 18-19 यावर्षातील कॅशबुक उपलब्ध असून त्या दोन वर्षाची चौकशी केल्यासही महत्वाची माहिती मिळू शकेल असा दावा सुत्रांनी केला आहे. त्यामुळे आता लेखा विभाग काय भुमीका घेणार याकडे जिल्हा परिषद वर्तुळाचे लक्ष लागले आहे.