ग्रामीण विद्यार्थी असल्याचा न्यूनगंड मनातून काढा- प्रा. अविनाश भारती:फुलसावंगी येथे पत्रकार संघांचा विद्यार्थी मार्गदर्शन कार्यक्रम

ग्रामीण भागातील विद्यार्थी व शिक्षकांनी समाजात असंख्य वेळा पुढाकार घेऊन आमूलग्रह बदल घडून आणले आहेत. आज शहरी भागात अनेक असे नावाजलेले शिकवणी वर्ग आहेत, ज्यात ग्रामीण भागातील शिक्षक योग्यरित्या चालवत आहेत. असंख्य ग्रामीण विद्यार्थ्यांनी स्पर्धा परीक्षेसारख्या कठीण परीक्षेत यश मिळवले आहे. म्हणून आपण ग्रामीण भागातील विद्यार्थी आहोत आपण काय करू? हा न्यूनगंड मनातून काढून टाका. असे विचार व्याख्याते प्रा. अविनाश भारती यांनी केले. फुलसावंगी पत्रकार संघांच्या वतीने स्व. सुधाकरराव नाईक कनिष्ठ महाविद्यालयात सोमवारी दि. २० जानेवारीला विद्यार्थी मार्गदर्शन कार्यक्रमाचे आयोजन करण्यात आले होते. त्यावेळी ते प्रमुख व्याख्याते म्हणून बोलत होते. कार्यक्रमाच्या अध्यक्षस्थानी पोलिस निरीक्षक धनराज निळे तर प्रमुख पाहुणे म्हणून गजानन वाघमारे, ए. एस. गायकवाड, डॉ. पुंडलिक आमले, कुणाल नाईल, महेंद्र कावळे, प्रा. विनोद राठोड, प्रा. सुधीर भाटे, प्रा. संदीप सूर्यवंशी उपस्थित होते. पुढे बोलताना ते म्हणाले की विद्यार्थी दशेत आपले आचार-विचार, मोबाईलचा अतिरेकी वापर, शिक्षक, पालक व विद्यार्थ्यांतील वैचारिक समरसतेची गरज, अशा विविध विषयांवर कुठे विनोदी, तर कुठे भावनात्मक आव्हान करत मार्गदर्शन केले. सलग अडीच तास चाललेले भाषण विद्यार्थी व पालकांनी स्तब्ध होऊन ऐकले. कार्यक्रमाचे प्रस्ताविक शैलेश वानखेडे यांनी केले. संचलन तसलीम शेख तर आभार पत्रकार संघांचे अध्यक्ष विवेक पांढरे यांनी मानले. कार्यक्रमासाठी विवेक शेळके, डॉ. गजानन वैद्य, विवेक पांढरे, शैलेश वानखडे, तसलीम शेख, संजय जाधव, चंद्रशेखर पंडागडे, शेख रिजवान, विक्की भिसे, सचिन छननिकर यांनी पुढाकार घेतला. ग्रामीणला मार्गदर्शनच नाही शैक्षणिक क्षमता व कौशल्य असूनही केवळ मार्गदर्शनाच्या अभावामुळे ग्रामीण विद्यार्थी शैक्षणिक क्षेत्रात मागे राहत आहे. ही बाब हेरून फुलसावंगी पत्रकार संघांच्या वतीने दरवर्षी पत्रकार दिनाचे औचित्य साधून विद्यार्थी व्याख्यान मार्गदर्शन कार्यक्रमाचे आयोजन केले जाते. ज्यामध्ये महाराष्ट्रातील प्रसिद्ध विचारवंत व विद्यार्थी मार्गदर्शक अशा वक्त्यांच्या समावेश असतो. यावर्षी स्व. सुधाकरराव नाईक कनिष्ठ महाविद्यालयात या कार्यक्रमाचे आयोजन करण्यात आले होते.