बेळगाव : मधमाश्यांच्या हल्ल्यात शेतकर्‍याचा मृत्यू

बेळगाव : शेतात गवत कापत असताना मधमाश्यांनी दंश केल्याने एका शेतकर्‍याचा मृत्यू तर अन्य एक जण जखमी झाला. मंगळवारी सकाळी खासबाग शिवारात मधमाश्यांच्या हल्ल्यात जखमी झालेल्या शेतकर्‍याचा बुधवारी मृत्यू झाला. मोनाप्पा शंकर भातकांडे (वय 74, रा. होसूर बसवाण गल्ली, शहापूर) असे मृताचे, तर मारुती जोतिबा हलगेकर (75, रा. गणेश पेठ गल्ली, जुने बेळगाव) असे जखमीचे नाव आहे. घटनेची नोंद शहापूर पोलिस ठाण्यात झाली आहे.

मोनाप्पा मंगळवारी सकाळी 8 च्या दरम्यान खासबाग येथील मारुती हलगेकर यांच्या शेतात गवत आणण्यासाठी गेले होते. गवत कापत असताना मधमाश्यांनी अचानक जोरदार हल्ला चढवत दंश केल्याने मोनाप्पा गंभीर जखमी झाले. त्यांच्या शेजारीच असलेले मारुती यांना देखील मधमाशांनी केल्याने तेही जखमी झाले. काही वेळानंतर जखमीना जिल्हा रुग्णालयात दाखल करण्यात आले. मात्र, अधिक प्रमाणात दंश झाल्याने मोनाप्पा यांचा बुधवारी (दि.20) सकाळी 7.50 च्या दरम्यान उपचाराचा उपयोग न झाल्याने मृत्यू झाला. ऐन सुगीच्या हंगामात अशा प्रकारची घटना घडल्याने शेतकर्‍यांमध्ये भीतीचे वातावरण निर्माण झाले आहे. मोनाप्पा यांच्या पश्चात पत्नी, भावजय, दोन पुतणे, तीन पुतण्या, नातवंडे असा परिवार आहे. घटनेची माहिती मिळताच शहापूर पोलिसांनी घटनास्थळी भेट देऊन पंचनामा केला.