राज्यस्तरीय इंद्रधनुष्य स्पर्धेत अमरावती विद्यापीठाने पटकावली सात पारितोषिके:कुलगुरू डॉ. मिलींद बारहाते यांनी विद्यार्थ्यांचा सत्कार करत केले कौतूक

अकोला येथील डॉ. पंजाबराव देशमुख कृषी विद्यापीठात नुकत्याच झालेल्या २० व्या राज्यस्तरीय इंद्रधनुष्य स्पर्धेत संत गाडगे बाबा अमरावती विद्यापीठाच्या चमुने उत्कृष्ट सादरीकरण करून ७ पुरस्कार पटकावले. या विद्यार्थ्यांनी घवघवीत यश संपादन करत विद्यापीठाचा नावलौकीक वाढवला. या यशाबद्दल कुलगुरू डॉ. मिलींद बारहाते यांनी सर्व यशस्वी विद्यार्थ्यांचा सत्कार केला. यश प्राप्त करावयाचे असेल तर जिद्द, चिकाटी आणि प्रामाणिक प्रयत्न आवश्यक असून या गुणांद्वारे हमखास यश पदरात पडते. कोणत्याही स्पर्धेत जय - पराजय हा महत्वाचा नसतो, तर सहभागी होऊन निखळ आनंद प्राप्त करणे महत्वाचे असते, असेही कुलगुरू याप्रसंगी म्हणाले. यात सुगम संगीत स्पर्धेत अबसार साबरीने प्रथम क्रमांक पटकावला. तर पाश्चिमात्य एकल स्पर्धेत कोमल ढोकेने दुसरा, स्वरवाद्य कला प्रकारामध्ये आकाश वानखडेने दुसरा, शास्त्रीय गायन स्पर्धेत शिवम शर्माने द्वितीय, वादविवाद स्पर्धेत नफिसा हुसैन व आरिफा हुसैन यांनी द्वितीय, मिमिक्रीमध्ये तेजस दिवेने तृतीय तर पाश्चिमात्य समूहगान स्पर्धेतही त्याने तृतीय क्रमांक पटकावला. विद्यार्थ्यांनी मिळवलेल्या या अभूतपूर्व यशाबद्दल कुलगुरू डॉ. मिलींद बारहाते, प्र-कुलगुरू डॉ. महेंद्र ढोरे, कुलसचिव डॉ. अविनाश असनारे, विद्यार्थी विकास संचालक डॉ. राजीव बोरकर यांनी अभिनंदन केले आहे. चमू व्यवस्थापक म्हणून डॉ. सावन देशमुख, प्रा. नेत्रा मानकर यांनी भूमिका पार पाडली.