राहुल सोलापूरकरांचे वक्तव्य; ‘प्रहार’ कार्यकर्त्यांकडून निषेध

छत्रपती शिवाजी महाराज यांच्याबद्दल अवमानजनक टिप्पणी करणाऱ्या राहुल सोलापुरकर यांचा प्रहारच्या पदाधिकारी, कार्यकर्त्यांनी तीव्र निषेध नोंदवला. जिल्हाधिकारी कार्यालयावर पोहोचलेल्या प्रहारींनी त्यांच्या प्रतीमेला रंग फासून आपल्या भावना व्यक्त केल्या. दरम्यान जिल्हाधिकारी यांना निवेदन सोपवून तत्काळ अटक केली जावी, अशी मागणीही नोंदवण्यात आली. प्रहारचे महानगर प्रमुख बंटी रामटेके यांच्या नेतृत्वात हे आंदोलन करण्यात आले. अभिनेते राहुल सोलापुरकर यांनी अलिकडेच एका कार्यक्रमात छत्रपती शिवाजी महाराज यांच्याबद्दल अवमानजनक वक्तव्य केले होते. महाराजांनी लाच देऊन आग्रा येथून स्वत:ची सुटका करवून घेतली होती, असे त्यांचे वक्तव्य होते. यावरुन सर्वत्र रान माजले असून ठिकठिकाणी त्यांचा निषेध नोंदवला जात आहे. या क्रमात आज अमरावती येथेही आंदोलन करण्यात आले. प्रहारच्या पदाधिकारी-कार्यकर्त् यांच्या मते सोलापुरकर यांचे हे वक्तव्य अत्यंत निंदनीय, तथ्यहीन व वादग्रस्त आहे. त्यामुळे कायदा व सुव्यवस्थेची स्थिती निर्माण होऊ शकते. त्यामुळे सोलापुरकर यांना तत्काळ अटक करुन त्यांच्यावर कठोर कारवाई केली पाहिजे. यावेळी प्रहारचे प्रदेश प्रवक्ते जीतूभाऊ देशमुख, जिल्हाध्यक्ष अभिजीत देशमुख, संपर्कप्रमुख गोलूभाऊ पाटील, संघटक श्यामभाऊ इंगळे, प्रदेश सचिव नंदकिशोर कुयटे आदी पदाधिकारी, कार्यकर्ते उपस्थित होते.