वर्दीचा रुबाब भारी, माझी ड्युटीच मजला प्यारी!:एपीआय पंकज कांबळे यांचे पोलिस गौरव गीत सोशल मीडियावर व्हायरल‎

निवडणूक असो की सण, उत्सव यामध्ये सर्वाधिक ताण असतो तो पोलिस खात्यावर. पोलिसदादा नागरिकांच्या सेवेसाठी अहोरात्र तत्पर असतो, सज्जनांच्या रक्षणासाठी कायम सज्ज असतो. अशा पोलिस बांधवांचे कौतूक करणारे गीत महाराष्ट्रात सध्या सोशल मीडियावर व्हायरल होत आहे. खाकी वर्दीचा रुबाब भारी... हे महाराष्ट्र पोलिसांचे गौरव गीत सोशल मीडियाच्या सर्व महत्त्वाच्या प्लॅटफॉर्मवर प्रसिद्ध झाले असून, या गाण्याला महाराष्ट्र भरातून पसंती मिळत आहे. अल्पावधीतच हे गीत सर्व पोलिस बांधवांपर्यंत पोहोचले असून, या गाण्यावर पोलिस बांधव अनेक रिल्स बनवत आहेत. खाकीच्या त्याग आणि त्यांच्या कर्तृत्वाचे वर्णन सहाय्यक पोलिस निरीक्षक पंकज कांबळे यांनी शब्दबद्ध केले. पोलिस हवालदार संघपाल तायडे यांनी गायलेले व राहुल तायडे यांच्या स्वरसाजातून निर्माण झालेले हे गाणे पोलिसांचे शौर्य, वीरता आणि कटिबद्धता याची अनुभूती देते. ‘राहतो २४ तास दक्ष करतो तपास नि:ष्पक्ष, घरदार विसरून फक्त गुन्ह्यावरती लक्ष..' गाण्यातल्या पहिल्या ओळीतील प्रत्येक शब्दावरून पोलिसांची किर्ती ऐकायला मिळते. गाण्याची चाल, मांडणी आणि बारकावे पंकज कांबळे यांनी जपले आहेत. पोलिसांचे जीवन अधिकच विस्कळीत होऊन जाते. सदैव जनतेच्या सेवेत असणाऱ्या पोलिस बांधवांना वेगवेगळ्या अडचणींना आणि समस्यांना सामोरे जावे लागते. त्या समस्या व व्यथा त्यांनी सुबकपणे मांडल्या आहेत. पोलिसांचे गौरव गीत असलेल्या व्हिडिओच्या चित्रिकरणात अकोला पोलिस अधीक्षक बच्चन सिंह यांच्यासह पोलिस दलातील विविध पदावरील आणि खात्यातील पोलिस अधिकारी व कर्मचाऱ्यांना दाखवण्यात आले आहे. त्यात अकोला शहरातील नागरिकांना भयानक परिस्थितीतही पोलिस कसे मदत करतात हे दाखवण्यात आले आहे.