પુણેમાં ભારતનો પરચો, સિરીઝ જીતી લીધી…

પુણેઃ સૂર્યકુમાર યાદવની કૅપ્ટન્સીમાં ભારતે અહીં આજે ઇંગ્લૅન્ડ સામેની ચોથી ટી-20 પંદર રનથી જીતીને સિરીઝની ટ્રોફી પર 3-1ના માર્જિન સાથે કબજો કરી લીધો હતો. બૅટિંગમાં હાર્દિક પંડ્યા તથા શિવમ દુબેએ પરચો બતાવ્યો ત્યાર બાદ બોલિંગમાં ખાસ કરીને રવિ બિશ્નોઈ, હર્ષિત રાણા અને વરુણ ચક્રવર્તીએ કમાલ કરી દેખાડી હતી.

જૉશ બટલરની ટીમ 182 રનના લક્ષ્યાંક સામે 19.4 ઓવરમાં 166 રનના સ્કોર પર ઑલઆઉટ થઈ હતી જેમાં હૅરી બ્રૂકના 51 રન હાઇએસ્ટ હતા.

સ્પિનર રવિ બિશ્નોઈએ 28 રનમાં ત્રણ તથા પેસ બોલર હર્ષિત રાણાએ 33 રનમાં ત્રણ વિકેટ લીધી હતી. સિરીઝના સુપરસ્ટાર સ્પિનર વરુણ ચક્રવર્તીએ 28 રનમાં બે વિકેટ અને અર્શદીપ સિંહે 35 રનમાં એક વિકેટ લીધી હતી.

એ પહેલાં, બૅટિંગ મળ્યા બાદ શરૂઆતના જોરદાર ધબડકા બાદ ભારતે બે શાનદાર ઇનિંગ્સની મદદથી છેવટે 20 ઓવરમાં નવ વિકેટે 181 રન બનાવ્યા હતા. હાર્દિક પંડ્યા (53 રન, 30 બૉલ, ચાર સિક્સર, ચાર ફોર) અને શિવમ દુબે (53 રન, 34 બૉલ, બે સિક્સર, સાત ફોર)ની જોડીએ છઠ્ઠી વિકેટ માટે 87 રનની જે ભાગીદારી કરી એનાથી ભારતીય ટીમની આબરૂ સચવાઈ હતી અને બ્રિટિશ ટીમને 182 રનનો પડકારરૂપ લક્ષ્યાંક આપી શકાયો હતો.

Also work : સચિનને મળશે બીસીસીઆઇનો આ પ્રતિષ્ઠિત પુરસ્કાર, 24 વર્ષની કરીઅરમાં ધૂમ મચાવી હતી…

રાજકોટની ત્રીજી મૅચમાં ખૂબ ધીમી શરૂઆત કર્યા બાદ 35 બૉલમાં 40 રન બનાવનાર હાર્દિકે ગઈ કાલે ધમાકેદાર બૅટિંગ કરીને પુણેનું સ્ટેડિયમ ગજવ્યું હતું. તેણે માત્ર 27 બૉલમાં હાફ સેન્ચુરી પૂરી કરી હતી અને કુલ 30 બૉલમાં 53 રન બનાવીને ટીમને સન્માનજનક સ્થિતિમાં લાવી દીધી હતી.

એ પહેલાં, ભારતની શરૂઆત આઘાતજનક હતી. 27 વર્ષના રાઇટ-આર્મ પેસ બોલર સાકિબ મહમૂદને માર્ક વૂડના સ્થાને રમવા મળ્યું હતું અને તેણે શરૂઆતમાં જ ત્રણ ધમાકા કર્યા હતા. તેણે પોતાની પહેલી ઓવરના પહેલા બે બૉલમાં સંજુ સૅમસન (1), તિલક વર્મા (0) અને છઠ્ઠા બૉલમાં કૅપ્ટન સૂર્યકુમાર યાદવ (0)ને આઉટ કરીને ધમાલ મચાવી દીધી હતી.

પહેલા 12 રનમાં ભારતની ત્રણ વિકેટ પડી ગઈ હતી. જોકે અભિષેક શર્મા (29 રન, 19 બૉલ, એક સિક્સર, ચાર ફોર)એ કમબૅકમૅન રિન્કુ શર્મા (30 રન, 26 બૉલ, એક સિક્સર, ચાર ફોર)ની જોડીએ ચોથી વિકેટ માટે 45 રનની પાર્ટનરશિપથી બાજી સુધારી લીધી હતી. અક્ષર પટેલ (પાંચ રન) ફરી એકવાર સારું રમવામાં નિષ્ફળ રહ્યો હતો.

સાકિબે ત્રણ તેમ જ જૅમી ઑવર્ટને બે વિકેટ અને બ્રાયડન કાર્સ તથા આદિલ રાશિદે એક-એક વિકેટ લીધી હતી.

હવે રવિવાર, બીજી ફેબ્રુઆરીએ વાનખેડે સ્ટેડિયમમાં છેલ્લી ટી-20 રમાશે.

દેશ દુનિયાના મહત્ત્વના અને રસપ્રદ સમાચારો માટે જોઈન કરો ' મુંબઈ સમાચાર 'ના WhatsApp ગ્રુપને ફોલો કરો અમારા Facebook, Instagram, YouTube અને X (Twitter) ને