યાનિક સિનર સતત બીજી વખત જીત્યો ઓસ્ટ્રેલિયન ઓપન: જર્મનીના એલેકઝાન્ડર ઝવેરેવને હરાવ્યો

મેલબોર્ન: ઓસ્ટ્રેલિયન ઓપનની ફાઈનલ મેચમાં યાનિક સિનરે એલેક્ઝાન્ડર ઝવેરેવને 6-3, 7-6 (4), 6-3થી હરાવીને ટાઈટલ જીત્યું હતું. સિનરે સતત બીજી વખત ઓસ્ટ્રેલિયન ઓપનનું ટાઇટલ જીત્યું હતું. આ સિવાય આ તેની કારકિર્દીનું ત્રીજું ગ્રાન્ડ સ્લેમ ટાઈટલ છે. 1992 અને 1993માં જિમ કુરિયર બાદ તે બે વખત આ ટાઇટલ જીતનાર સૌથી યુવા ખેલાડી બન્યો હતો. ઓસ્ટ્રેલિયન ઓપન 2025ની મેન્સ ફાઇનલ મેચ વિશ્વના નંબર વન યાનિક સિનર અને જર્મનીના એલેક્ઝાન્ડર ઝવેરેવ વચ્ચે રમાઈ હતી. યાનિક સિનર આ મેચ જીતવામાં સફળ રહ્યો હતો અને તેણે પોતાના ટાઈટલનો બચાવ પણ કર્યો હતો.

ઓસ્ટ્રેલિયન ઓપનમાં છેલ્લા બે સપ્તાહ દરમિયાન સિનરને સ્વાસ્થ્ય સમસ્યાઓનો સામનો કરવો પડ્યો હતો. પરંતુ તેનાથી તેની રમત પર કોઈ અસર થઈ ન હતી. આ સાથે તે સતત બીજી વખત ઓસ્ટ્રેલિયન ઓપન ટાઈટલ જીતવામાં સફળ રહ્યો હતો. આ મેચમાં યાનિક સિનરે એલેક્ઝાન્ડર ઝવેરેવને કારમી હાર આપી હતી. યાનિક સિનરે આ મેચ સીધા સેટમાં 6-3, 7-6 (4), 6-3થી જીતી હતી. બંને ખેલાડીઓ વચ્ચેની આ મેચ 2 કલાક અને 42 મિનિટ સુધી ચાલી હતી. યાનિક સિનરે છેલ્લા 13 મહિનામાં તેનું ત્રીજું ગ્રાન્ડ સ્લેમ ટાઈટલ જીત્યું છે. આ પહેલા તેણે યુએસ ઓપન 2024 અને છેલ્લી ઓસ્ટ્રેલિયન ઓપન 2024માં પણ જીત મેળવી હતી.

Also read: ઓસ્ટ્રેલિયન ઓપન ટેનિસની ઇનામની રકમમાં કરાયો 13 ટકાનો વધારો

એલેક્ઝાન્ડર ઝવેરેવ 2015થી ગ્રાન્ડ સ્લેમ રમી રહ્યો છે. દરમિયાન તે 3 વખત ફાઇનલમાં પહોંચવામાં સફળ રહ્યો છે. પરંતુ દરેક વખતે તેને હારનો સામનો કરવો પડ્યો છે. આ વખતે ઝવેરેવને ફાઇનલમાં પહોંચવા માટે વધારે મુશ્કેલીનો સામનો કરવો પડ્યો નથી. સેમિફાઈનલમાં તેણે નોવાક જોકોવિચના પડકારનો સામનો કર્યો હતો પરંતુ 24 વખતના ગ્રાન્ડ સ્લેમ ચેમ્પિયને પગમાં ઈજાના કારણે એક સેટ બાદ મેચમાંથી ખસી જવાનો નિર્ણય કર્યો હતો. આવી સ્થિતિમાં તેને ફાઇનલમાં એન્ટ્રી મળી હતી. નોંધનીય છે કે યાનિક સિનર ઓસ્ટ્રેલિયન ઓપનના ઈતિહાસમાં માત્ર 11મો ખેલાડી બન્યો છે જેણે પોતાના ટાઈટલનો બચાવ કર્યો છે.

દેશ દુનિયાના મહત્ત્વના અને રસપ્રદ સમાચારો માટે જોઈન કરો ' મુંબઈ સમાચાર 'ના WhatsApp ગ્રુપને ફોલો કરો અમારા Facebook, Instagram, YouTube અને X (Twitter) ને