సైఫ్‌కు బిగ్ షాక్.. పటౌడీ ప్యాలెస్ ఇక ప్రభుత్వానిదే.. వేల కోట్ల ఆస్తులు కూడా.. కారణమిదే

కత్తిపోట్ల నుంచి తేరుకుంటున్న బాలీవుడ్‌ స్టార్‌ సైఫ్ అలీఖాన్‌కు మరో షాక్‌ తగలబోతుందా ? సైఫ్ అలీఖాన్ కుటుంబానికి చెందిన రూ.15 వేల కోట్ల ఆస్తులను ప్రభుత్వం స్వాధీనం చేసుకునే అవకాశాలు కన్పిస్తున్నాయి. మధ్యప్రదేశ్ రాజధాని భోపాల్‌లో ఉన్న పటౌడీ కుటుంబానికి చెందిన ‘ఫ్లాగ్ హౌస్’ను కేంద్రం స్వాధీనం చేసుకునే అవకాశాలు కన్పిస్తున్నాయి. భోపాల్‌లో సైఫ్ కుటుంబానికి రూ.1000 కోట్లకు పైగా ఆస్తి ఉంది. దీనికి సంబంధించిన పలు వివాదాలు న్యాయస్థానాల్లో నడుస్తున్నాయి. కేసులపై 2015లో విధించిన స్టేను కోర్టు ఎత్తేసింది.

కోర్టు స్టే ఎత్తేయడంతో సైఫ్ అలీఖాన్ బాల్యంలో గడిపిన ఫ్లాగ్ స్టాఫ్ హౌస్, నూర్ ఉస్ సాభా ప్యాలెస్, దార్ ఉస్ సలాం, హబిబి బంగ్లా, అహ్మదాబాద్ ప్యాలెస్, కొఫేజా ప్రాపర్టీ సహా భోపాల్‌లోని పటౌడీ కుటుంబానికి చెందిన రూ. 15 వేల కోట్ల విలువైన ఆస్తి ఎనిమీ ప్రాపర్టీ యాక్ట్ 1968 ప్రకారం ప్రభుత్వం అధీనంలోకి వెళ్లే అవకాశం ఉంది. ఎనిమీ ప్రాపర్టీ చట్టాన్ని 1968లో రూపొందించారు. ఈ చట్టం ప్రకారం దేశ విభజన తర్వాత పాకిస్తాన్‌కు వెళ్లిపోయిన వ్యక్తులు.. భారత్‌లో వదిలిపెట్టిన ఆస్తులపై అధికారం కేంద్ర ప్రభుత్వానికి దక్కుతుంది. భోపాల్ చిట్టచివరి నవాబ్ హమీదుల్లా ఖాన్‌కు ముగ్గురు కుమార్తెలు.. ఖాన్ ఆస్తికి చట్టబద్ధ వారసురాలు ఆయన పెద్ద కూతురు అబిదా కాగా.. ఆమె 1950లో పాక్‌కు వలస వెళ్లిపోయారని కేంద్ర ప్రభుత్వం స్పష్టం చేసింది. కాబట్టి ఈ ఆస్తి ఎనిమీ ప్రాపర్టీ చట్టం కింద ప్రభుత్వానికి చెందుతుందని తెలిపింది. కానీ, నవాబ్ రెండో కుమార్తె సాజిదా సుల్తాన్ వారసులు సైఫ్ అలీ ఖాన్, షర్మిలా ఠాగూర్ ఈ ఆస్తిపై తమకు హక్కు ఉందని కోర్టును ఆశ్రయించారు.

భోపాల్‌ ప్యాలెస్ సమీపంలోని ఫ్లాగ్ స్టాఫ్ హౌస్ సైఫ్ అలీఖాన్ కుటుంబానికి వారసత్వంగా దక్కింది. 2011లో మన్సూర్ అలీ ఖాన్ పటౌడీ మరణం తర్వాత సైఫ్‌కి భోపాల్ నవాబ్ బిరుదుతో తలపాగా ఉత్సవం కూడా ఘనంగా జరిపించారు. ఇప్పుడు పటౌడీ వంశానికి సైఫ్ అలీ ఖాన్ ప్రధాన వారసుడు. భోపాల్ చారిత్రక రాచరిక రాష్ట్రాల ఆస్తులపై 2015 నుంచి ఉన్న స్టేను కోర్టు ఎత్తేసింది. ఈ స్టే ఎత్తేయడంతో ప్రభుత్వం ఆ ఆస్తులను స్వాధీనం చేసుకునే అవకాశం ఉంది. దీంతో ఈ కేసులో అప్పీలేట్ అథారిటీ ముందు తమ వాదనలను వినిపించాలని సైఫ్ అలీ ఖాన్, అయన తల్లి షర్మిలా ఠాగూర్, సోదరీమణులు సోహా, సబా అలీ ఖాన్, పటౌడీ సోదరి సబీహా సుల్తాన్‌లను హైకోర్టు ఆదేశించింది.

పటౌడీ కుటుంబ సభ్యులను 30 రోజుల్లోగా అప్పీలేట్ అధికారి ముందు హాజరుపరచాలని జస్టిస్ వివేక్ అగర్వాల్‌తో కూడిన ఏకసభ్య ధర్మాసనం కొన్ని రోజుల క్రితం ఆదేశించింది. కానీ నిర్దేశిత గడువులోగా పటౌడీ కుటుంబం తమ వాదనలను వినిపించలేదు. కోర్టు ఇచ్చిన గడువు ఇప్పటికే ముగియగా… పటౌడీ కుటుంబం దీనిపై ఎటువంటి దావా వేయలేదు. తమ వారసత్వ ఆస్తులను ప్రభుత్వం స్వాధీనం చేసుకోకుండా డివిజన్ బెంచ్‌లో ఈ ఉత్తర్వులను సవాలు చేయడమే పటౌడీ కుటుంబానికి మిగిలి ఉన్న ఏకైక మార్గం. వాస్తవానికి 2019లో సాజిద్ సుల్తాన్‌ను చట్టబద్దమైన వారసురాలిగా కోర్టు గుర్తించింది. కానీ, ఇటీవల తీర్పు ఆ కుటుంబ ఆస్తి వివాదాన్ని మరోసారి తెరపైకి తెచ్చింది.

మరిన్ని సినిమా వార్తల కోసం ఇక్కడ క్లిక్ చేయండి