EPF vs NPS: రిటైర్‌మెంట్ సమయంలో ఆర్థిక భరోసా.. ఆ రెండు ప్లాన్స్‌తోనే సాధ్యం

రిటైర్మెంట్ పథకాలలో ఎంప్లాయిస్ ప్రావిడెంట్ ఫండ్ (ఈపీఎఫ్), నేషనల్ పెన్షన్ స్కీమ్ (ఎన్ పీఎస్) ప్రధానంగా  ఉన్నాయి. వడ్డీ రేట్లు సమానంగా ఉన్నా ఈ పథకాల మధ్య కీలక తేడాలు ఉన్నాయి. ఈ నేపథ్యంలో ఈపీఎఫ్ ఎన్‌పీఎస్ మధ్య తేడాలను, ప్రయోజనాలను తెలుసుకుందాం.

ఈపీఎఫ్ (ఎంప్లాయీస్ ప్రావిడెంట్ ఫండ్)

• వివిధ ఫ్యాక్టరీలలో పనిచేసే కార్మికులు, ఉద్యోగులందరూ ఈపీఎఫ్ పథకం కిందకు వస్తారు. ప్రతి నెలా వారి జీతం నుంచి కొంత మొత్తం దానిలో జమఅవుతుంది. అంతే మొత్తాన్ని కంపెనీ కూడా కలుపుతుంది.
• ఈపీఎఫ్ కోసం నెలవారీ బేసిక్ జీతంలోని కొంత మొత్తం చెల్లించాలి. బేసిక్ జీతం ప్రకారం ఎంత కట్టాలో లెక్కిస్తారు. దానికి సమానమైన మొత్తాన్ని కంపెనీ చెల్లిస్తుంది. అయితే ఉద్యోగికి ఇష్టమైతే మరింత ఎక్కువ కట్టుకోవచ్చు.
• ఈపీఎఫ్ కు వచ్చిన చందాలను రుణ సాధనాల్లో పెట్టుబడి పెడతారు. ఇటీవలే పీఎఫ్ నిధిలో ఐదు శాతాన్ని ఈక్విటీ మార్కెట్లలో ఈపీఎఫ్ వో ఇన్వెస్ట్ చేస్తోంది. దీనికి కూడా గరిష్టంగా 15 శాతం వరకూ పరిమితి ఉంది.
• ఈ పథకంలో చందాదారులందరికీ వడ్డీ ఓకే రకంగా అందిస్తారు. గతేడాది 8.7 శాతం అమలు చేశారు. దేశంలో వడ్డీ రేట్లు తక్కుతున్న నేపథ్యంలో అదే స్థాయిలో కొనసాగవచ్చు, లేకపోతే తగ్గవచ్చు.
• ప్రైవేటు కంపెనీల్లో పనిచేసే వేతన జీవులకు మాత్రమే ఈపీఎఫ్ అందుబాటులో ఉంటుంది. సుమారు 20 మందికి పైగా ఉన్న ప్రతి కంపెనీ తన ఉద్యోగులకు ఈపీఎఫ్ అమలు చేయాలి.
• ఆదాయపు పన్ను చట్టంలోని సెక్షన్ 80 సీ కిందకు ఈపీఎఫ్ వస్తుంది. దీని ప్రకారం గరిష్టంగా రూ.1.50 లక్షల వరకూ పన్ను మినహాయింపులు పొందవచ్చు.
• రిటైర్మెంట్ తర్వాత మెచ్యూరిటీ సమయంలో మొత్తం ఈపీఎఫ్ ను పన్ను ప్రసక్తి లేకుండా విత్ డ్రా చేసుకోవచ్చు.

ఎన్ పీఎస్ (నేషనల్ పెన్షన్ స్కీమ్)

• 2004 ఏప్రిల్ తర్వాత విధుల్లో చేరిన ప్రభుత్వ ఉద్యోగులందరికీ ఎన్ పీఎస్ ను తప్పనిసరి చేశారు. వీరితో పాటు వ్యాపారవేత్తలు, స్వయం ఉపాధి పొందుతున్న మహిళలు, సంఘటిత, అసంఘటిత రంగాల్లో పనిచేసే ప్రజలు కూడా ఎన్ పీఎస్ లో పెట్టుబడి పెట్టవచ్చు.
• ప్రైవేటు కంపెనీ ఉద్యోగులు తమ రిటైర్మెంట్ ప్రణాళిక కోసం ఈపీఎఫ్ తో పాటు ఎన్ పీఎస్ లో కొనసాగవచ్చు.
• ఈ పథకానికి ఎంత పెట్టుబడి పెట్టాలో చందాదారులే నిర్ణయించుకోవచ్చు. ఒకేసారి ఏక మొత్తంలోనైనా, వాయిదాల రూపంలోనైనా చెల్లించే అవకాశం ఉంది. ఒక ఆర్థిక సంవత్సరంలో కనిష్టంగా రూ.6వేలు కట్టాల్సి ఉంటుంది. గరిష్ట పరిమితి లేదు.
• ఈక్విటీ, డెట్ సాధనాల్లో ఏరకంగా పెట్టుబడి పెట్టాలన్నది ఇన్వెస్టరే నిర్ణయించుకోవచ్చు.
• పదేళ్లు, అంతకన్నా ఎక్కువ కాలం పెట్టుబడి పెడితే రాబడి బాగుంటుంది. ఈపీఎఫ్ స్కీమ్ కన్నా దాదాపు రెండు నుంచి మూడు శాతం ఎక్కువగా వస్తుంది.
• ఆదాయపు పన్ను చట్టంలోని 80 సీసీడీ (1బీ) కిందకు ఎన్ పీఎస్ వస్తుంది. దీని ద్వారా ఏడాదికి గరిష్టంగా రూ.50 వేల వరకూ మినహాయింపు పొందవచ్చు. ఇది 80సీకి అదనంగా అందిస్తారు.
• ఒక రకంగా చెప్పాలంటే ఈపీఎఫ్, ఎన్ పీఎస్ ఒకదానికి ఒకటి ప్రత్యామ్నాయం కాదు. ఈ రెండు వివిధ రకాల ప్రయోజనాలను అందిస్తాయి. ఒక దానికి తోడుగా మరొకటి ఉండే ఎక్కువ రాబడి పొందే అవకాశం ఉంటుంది.

మరిన్ని బిజినెస్ వార్తల కోసం ఇక్కడ క్లిక్ చేయండి..