राष्ट्रवादीतील फूट अन् भाजपातील काथ्याकूट बाबासाहेबांच्या मुळावर!
– महादेव कुंभार
लातूर (Latur Assembly Elections) : रिडालोससारख्या पक्षाला निवडून देणारा अहमदपूर विधानसभा मतदार संघ (Latur Assembly Elections) हा बहुजन चळवळीचा मतदार संघ असून या विधानसभा मतदार संघातील मतदारांनी एकाच उमेदवाराला सलग दुसऱ्यांदा निवडून दिल्याचा इतिहास नाही. त्यातच राष्ट्रवादीतील फूट आणि भाजपाच्या स्थानिक नेत्यांनी चालविलेला काथ्याकूट मुळावर बसल्याने यंदाच्या निवडणुकीत ‘मी पुन्हा येईन’, असे म्हणणाऱ्या विद्यमान आमदार बाबासाहेब पाटील यांची वाट सध्या तरी बिकट झाली आहे.
2009 च्या विधानसभा निवडणुकीनंतर थेट 2019 मध्ये विद्यमान आमदार बाबासाहेब पाटील विजय झाले. 2014 च्या निवडणुकीत ते अपक्ष उमेदवार विनायकराव पाटील यांच्याकडून पराभूत झाले होते. 2009 मध्ये रिडालोसकडून विधिमंडळात पोहोचलेले बाबासाहेब 2014 च्या (Latur Assembly Elections) निवडणुकीत भाजपाची प्रचंड लाट असतानाही अपक्ष उमेदवार विनायकराव पाटील यांच्याकडून पराभूत झाले. तर भाजपाही तिसऱ्या स्थानावर राहिला. 2019 मध्ये राष्ट्रवादी काँग्रेस पक्षाकडून बाबासाहेब पाटील यांना उमेदवारी मिळाली आणि 29 हजार 191 मतांचे मताधिक्य घेत त्यांनी भाजपाचे उमेदवार विनायकराव पाटील यांचा पराभव केला. अर्थात् 2019 च्या निवडणुकीचा विचार केला तर भाजपामध्ये दिलीपराव देशमुख व आयोध्या केंद्रे यांनी केलेली बंडखोरी विनायकराव पाटील यांच्या मुळावर आली. त्या निवडणुकीत अपक्ष उमेदवार दिलीपराव देशमुख यांना 45 हजार 846 तर वंचित बहुजन आघाडीच्या उमेदवार आयोध्या केंद्रे यांना 22141 मते मिळाली.
गेल्या दोन वर्षात राज्यामध्ये झालेले सत्ता परिवर्तन चर्चेचा विषय ठरला. शरद पवार यांच्या राष्ट्रवादी काँग्रेसमध्ये फूट पडून अजित पवार यांनी महायुतीत सामील होण्याचा निर्णय घेतल्याने अहमदपूरचे विद्यमान आमदार बाबासाहेब पाटील अजित पवारांच्या गटात गेले. ही संधी साधत गेल्यावेळी भाजपाकडून लढलेले माजी राज्यमंत्री विनायकराव पाटील यांनी राष्ट्रवादी काँग्रेसच्या शरद पवार गटात प्रवेश करत जोरदार धक्का दिला. अर्थात् शरद पवारांच्या राष्ट्रवादीकडून विनायकराव पाटील यांना उमेदवारी जवळपास निश्चित झाल्याचे संकेत आहेत तर अजित पवार गटाकडून विद्यमान आमदार बाबासाहेब पाटील यांची उमेदवारी निश्चित आहे. मात्र गेल्या काही महिन्यांपासून अहमदपूर विधानसभा मतदार संघात स्थानिक भाजपा नेत्यांनी आमदार बाबासाहेब पाटील यांना प्रचंड विरोध चालविला आहे. अहमदपूर मतदार संघातून काहीही झाले तरी भाजपा स्थानिक नेते एक उमेदवार मैदानात उतरवतील, असा निश्चय करून हे नेते कामाला लागले आहेत. भाजपामध्ये चाललेला हा काथ्याकुट आणि राष्ट्रवादीत पडलेली फूट बाबासाहेब पाटील यांना चांगलीच महागात पडणार आहे.
‘आधे इधर, आधे उधर’…
बोटावर मोजण्याइतपत काही लोक सोडले तर राष्ट्रवादीचा लोंढा शरद पवारांच्या मागे ठाम व भक्कमपणे उभा आहे. गेल्या महिन्यात उपमुख्यमंत्री अजित पवार यांचे अहमदपुरात झालेले दौरेच पक्षाला ‘गर्ते’तून बाहेर काढण्यासाठीच होते, हेही लपून राहिले नाही. एकंदर (Latur Assembly Elections) मतदारसंघात महायुतीचा विचार केला तर ‘आधे इधर, आधे उधर’ अशी गत झाली असून उर्वरित ‘बाकी’ पाठीशी घेवून बाबासाहेब कोणते डाव खेळतील, यावर कुस्तीचा निर्णय राहणार आहे.