بڈھال کے مکینوں کی راحت رسانی کیلئے انتظامیہ سرگرم، 24 جنوری کے بعد کوئی نیا معاملہ سامنے نہیں آیا

راجوری// ضلع راجوری کے گاؤں بڈھال میں صحت کی بحرانی صورتحال میں تسلی بخش بہتری کے آثار سامنے آ رہے ہیں، جہاں 24 جنوری 2025 کے بعد سے کوئی نیا کیس رپورٹ نہیں ہوا۔
ضلع انتظامیہ راجوری، جو ڈپٹی کمشنر ابھیشیک شرما کی زیر نگرانی کام کر رہی ہے، متاثرہ افراد کی فلاح و بہبود کے لیے انتہائی احتیاطی تدابیر اپنائے ہوئے ہے۔
موجودہ صورتحال کو بہتر بنانے اور مزید جانی نقصان سے بچنے کے لیے 87 خاندانوں کو جن میں 364 افراد شامل ہیں، گاؤں بڈھال سے راجوری منتقل کر دیا گیا ہے۔ یہ خاندان اس وقت نرسنگ کالج، بوائز ہائیر سیکنڈری سکول اور جی ایم سی اینڈ اے ایچ میں پناہ گزین ہیں اور ان کی نگرانی جاری ہے۔ متاثرہ خاندانوں کے لیے مکمل انتظامات کیے گئے ہیں تاکہ ان کی راحت و سکونت کا خیال رکھا جا سکے۔
متاثرہ افراد کو کھانا، پانی، بچوں کا کھانا، صفائی کا سامان، ادویات، کپڑے اور روز مرہ کی ضروریات فراہم کی جا رہی ہیں۔ اس عمل کی نگرانی ڈاکٹر اور ضلع انتظامیہ کے افسران کر رہے ہیں۔
خاندانوں کی آرام دہ رہائش کے لیے 240 بیڈز، 490 کمبل اور 303 گدے فراہم کیے گئے ہیں، جبکہ 176 بیڈز، 300 کمبل اور 240 گدے ریزرو رکھے گئے ہیں۔
موقع پر ایک طبی ٹیم، جس میں تین ڈاکٹر اور چھ پیرا میڈکس شامل ہیں، 24 گھنٹے کام کر رہی ہے۔ نگہداشت والی ایمبولنسیں بھی جگہ جگہ موجود ہیں۔
کھانے کے انتظامات سی سی ٹی وی نگرانی میں تیار کیے جا رہے ہیں، جبکہ کھانے کے نمونوں کو این ایف ایل غازی آباد اور پٹولی فوڈ ٹیسٹنگ لیب، جموں بھیجا جا رہا ہے۔
آنگن واڑی کارکنان اور چائلڈ ڈولپمنٹ پروجیکٹ آفیسرز (سی ڈی پی اوز) چھ سال سے کم عمر بچوں کی دیکھ بھال کے لیے تعینات کیے گئے ہیں۔ سکول جانے والے بچوں کے لیے عارضی تعلیمی انتظامات کیے گئے ہیں۔
ہنر سکھانے کے لیے کرافٹ اساتذہ اور آئی ٹی آئی کے انسٹرکٹرز سلائی اور دیگر ہنر سکھا رہے ہیں۔ سلائی مشینیں سوشل ویلفیئر ڈیپارٹمنٹ کی طرف سے فراہم کی گئی ہیں۔
زراعت، باغبانی اور محنت کے محکموں کے افسران متاثرہ خاندانوں کو حکومت کے مختلف سکیموں جیسے پی ایم ای جی پی، دکیش کسان، ای-شرم، پی ایم جے جے بی وائی اور پی ایم ایس بی وائی سے آگاہ کر رہے ہیں۔
گاؤں بڈھال کے باقی 808 گھروں (3,700 افراد) کی حفاظت کے لیے گاؤں کو 14 حصوں میں تقسیم کیا گیا ہے، جس کی نگرانی 182 افسران پر مشتمل بین شعبہ جاتی ٹیم کر رہی ہے۔
تمام دکانیں اور کاروباری ادارے سیل کر دیے گئے ہیں اور راشن کی فراہمی سخت نگرانی میں کی جا رہی ہے۔ ٹیمیں 424 گھریلو جانوروں اور 168 پرندوں کو کھانا فراہم کر رہی ہیں۔
روزانہ کی بنیاد پر کھانے پینے کی اشیاء اور دیگر مواد کے نمونے لیے جا رہے ہیں اور جی ایم سی راجوری میں 167 خون، پیشاب اور ناک کے نمونے ٹیسٹ کے لیے جمع کیے گئے ہیں۔
ایڈیشنل ڈسٹرکٹ ڈولپمنٹ کمشنر کی نگرانی میں ایک کنٹرول روم قائم کیا گیا ہے، جو عوامی سوالات کا جواب دینے اور حالات کی تازہ ترین معلومات فراہم کرنے کے لیے کام کر رہا ہے تاکہ افواہوں اور بے چینی کو روکا جا سکے۔
ضلع انتظامیہ مکمل طور پر اس صورتحال کو حل کرنے اور متاثرہ خاندانوں کی فلاح و بہبود کو یقینی بنانے کے لیے کام کر رہی ہے۔